Lamine Yamal u bë lojtari më i ri që shënon në histori të kampionateve evropiane. 16-vjeçari shënoi në fitoren e Spanjës 2:1 ndaj Francës për t’u kualifikuar në finalen e “Euro 2024”.

Pas përfundimit të ndeshjes, Yamal i është drejtuar kamerave duke thënë: “Fol tani, fol tani”.

Sulmuesi spanjoll i është përgjigjur mesfushorit të Francës, Adrien Rabiot, i cili para ndeshjes ishte shprehur se Yamali duhet të bënte edhe më shumë për ta ndihmuar Spanjën të kalojë në finale.

“Nuk e di nëse do të jetë nën presion sepse është shumë i ri, por ka kualitet të madh dhe është lojtar me shumë cilësi. Ne e dimë se ai ruan qetësinë e tij, por padyshim që mund të jetë pak e vështirë për të… Ne do të përpiqemi t’i ushtrojmë presion dhe ta largojmë atë nga zona e tij e rehatisë nëse ai dëshiron të luajë në finale, ai duhet të bëjë më shumë gjëra se sa ka bërë deri tani”, pati thënë Rabiot.

Yamal ishte kundërpërgjigjur me një fotografi para ndeshjes.

“Vepro në heshtje. Flit vetëm atëherë kur është koha të thuash “shah, mat””, thuhej në këtë fotografi që kishte shpërndarë ai.