Kandidatja për deputete nga Lidhja Demokratike e Kosovës, Marigona Geci, ka nderuar kujtimin e presidentit historik Ibrahim Rugova, në përvjetorin e 19-të të ndarjes së tij nga jeta.

Ajo përmendi kontributin e paçmuar të Rugovës në themelimin e shtetit të Kosovës dhe në udhëheqjen e popullit drejt lirisë, pavarësisë dhe demokracisë.

“Sot, në 19-vjetorin e ndarjes nga jeta të presidentit historik Dr. Ibrahim Rugovës, nderojmë me mirënjohje themeluesin e shtetit të Kosovës dhe simbolin e rezistencës paqësore. Me vizionin dhe përkushtimin e tij, ai udhëhoqi popullin drejt lirisë, pavarësisë dhe demokracisë“.

Geci nënvizoi se vizioni dhe përkushtimi i Rugovës vazhdojnë të jenë udhërrëfyes për Kosovën në rrugën e saj drejt integrimeve euroatlantike, si dhe në forcimin e marrëdhënieve me Shtetet e Bashkuara të Amerikës.

“Fryma dhe vlerat e tij vazhdojnë të jenë udhërrëfyes për Kosovën si shtet i pavarur dhe sovran, në rrugën drejt NATO-s, BE-së dhe miqësisë së përhershme me SHBA-të” shkroi Geci, duke shtuar se kujtimi i Presidentit Rugova do të mbetet i përjetshëm për të gjithë qytetarët e Kosovës.