Policia e Shqipërisë ka njoftuar se është gjetur i vdekur një turist bullgar në Majën e Jezercës në Shqipëri. 

Policia ka njoftuar se të  martën mbrëma rreth orës 22:30 ishte informuar për dy turistë bullgarë që kanë mbetur të bllokuar në Majën e Jezercës. 

Policët nga Tropoja janë nisur në atë drejtim, por pavarësisht kërkime për disa orë s’u lokalizuan turistët. 

Në mëngjes është nisur një ekip i kërkim-shpëtimit malor nga Emergjenca Civile me helikopter të Ministrisë së Mbrojtjes, për të ndihmuar lokalizimin e turistëve. 

Pas disa orës kërkime një turist 32-vjeçar është gjetur i vdekur, ndërsa dyshohet se humbi jetën pasi rrëshqiti nga një lartësi dhe mori lëndime të rënda.  Turisti tjetër është larguar drejt Malit të Zi në gjendje të mirë shëndetësore. 

“Më datë 11.06.2024, rreth orës 22:30, Salla Operative e Komisariatit të Policisë Tropojë ka marrë njoftim se 2 turistë bullgarë, gjatë eksplorimit të zonës, në vendin e quajtur “Maja e Jezercës”, kishin mbetur të bllokuar për shkak të terrenit të vështirë.    Menjëherë pas marrjes së njoftimit, shërbimet e Komisariatit të Policisë Tropojë, janë nisur me këmbë drejt adresës së dhënë, së bashku me ekipin mjekësor të spitalit të Tropojës dhe banorë të zonës.  Pavarësisht kërkimeve për disa orë, nuk është bërë i mundur  lokalizimi i turistëve.   Në mëngjes, ekipi i kërkim-shpëtimit malor i Emergjencave Civile është nisur me helikopterin e Ministrisë së Mbrojtjes, për të lokalizuar dhe ndihmuar turistët.   Pas disa orësh kërkime është gjetur pa shenja jete njëri nga turistët, 32 vjeç, i cili dyshohet se për shkak të terrenit të thepisur malor, ka rrëshqitur nga një lartësi dhe si pasojë e dëmtimeve ka humbur jetën.       Nga ekipi i kërkim-shpëtimit është bërë e mundur nxjerrja e trupit të pajetë, i cili do të  transportohet me helikopter, drejt morgut. Turisti tjetër është larguar drejt Malit të Zi, në gjendje të mirë shëndetësore”, është njoftuar nga Policia e Shqipërisë.