Presidenti i Ukrainës, Volodymyr Zelenski i ka kërkuar komandantit më të lart ushtarak që deri të hënën të jap dorëheqje.

Por përkundër kësaj Valerii Zaluzhnyi ka refuzuar të bëjë një gjë të tillë.

Tensionet mes të dyve kanë qenë për javë të tëra në mes të dështimit të një kundërofensive të Ukrainës, por sugjerimi se Zaluzhnyi mund të largohej me forcë megjithatë erdhi si një tronditje për shumë njerëz, shkruan The Guardian.

Oleksii Goncharenko, një deputet i opozitës ukrainase dhe aleat i gjeneralit, u shpreh se e kuptonte se “dje presidenti i kërkoi Zaluzhnyit të jepte dorëheqjen, por ai nuk pranoi ta bënte këtë”.

Ai fajësoi përplasjet e personalitetit për konfliktin. 

“Personalisht mendoj se kjo është një ide e keqe. Nuk ka çështje thelbësore mes tyre, por zyra e Zelenskiy ka qenë e shqetësuar se Zaluzhnyi ka bërë deklarata politike dhe jo ushtarake”, tha Goncharenko.

Zëvendësuesi më i mundshëm do të ishte Kyrylo Budanov, kreu i inteligjencës ushtarake të Ukrainës, përgjegjës për operacionet e fshehta kundër Moskës. Budanov u propozua në fillim të këtij viti si një zëvendësues i Oleksii Reznikov si ministër i mbrojtjes, në një tjetër sagë të zgjatur shkarkimi që filloi me periudha të ngjashme spekulimesh.