Një qendër tregtare në qytetin Esen në Gjermani është urdhëruar nga policia që sot të mbetet e mbyllur, për shkak të “indikacioneve konkrete për sulm të mundshëm”.

“Gjendja aktuale e hetimeve tona tregon se kërcënimi është ekskluzivisht në qendrën tregtare”, thuhet në deklaratën e policisë, por nuk jepen detaje të tjera.

Policia i tha agjencisë së lajmeve DPA, se ka pasur indikacione se qendra do të ishte në shënjestër të terroristëve, prandaj është vendosur për mbylljen e saj, përcjell rel.

Aktualisht, Gjermania është në gjendje të lartë alarmi pas sulmeve vdekjeprurëse të islamistëve radikalë në Francë dhe Belgjikë, dhe pasi një person nga Tunizia, të cilit nuk i ishte dhënë azil, me kamion e ka sulmuar turmën e njerëzve në një treg të Krishtlindjeve në muajin dhjetor të vitit të kaluar, me ç’rast i ka vrarë 12 vetë.