“A mendoni se mund t’i besoni Putinit?”, gjenerali gjerman, Ralf Hammerstein, pyet me një buzëqeshje të ngrysur. Është një pyetje retorike, së cilës shumica e Evropës do t’i jepte të njëjtën përgjigje – jo.
Kështu fillon një reportazh i mediumit prestigjioz amerikan, CNN, që përshkruan investimet enorme të Gjermanisë me kancelarin e mundshëm, Friedrich Merz, në fushën e ushtrisë.
Teksa administrata Trump vazhdon të ndjekë marrëveshjen për t’i dhënë fund luftës në Ukrainë evropianët, për herë të parë pas disa dekadave, po fokusohen në fuqinë e tyre ushtarake.
Askund ky ndryshim nuk është aq i dukshëm sesa në Gjermani. Forcat e tyre të armatosura, të njohura si Bundeswehr, kanë qenë viktimë e viteve të nën-investimit – por kjo do të ndryshojë.
Kancelari i mundshëm i Gjermanisë, Friedrich Merz, ka vendosur që tani është momenti që shteti gjerman të investojë në ushtrinë e saj, investime këto që nuk janë parë që nga Lufta e Ftohtë.
Gjermania sapo ka kaluar një reformë të madhe për frenimin e saj të borxhit kushtetues, duke zhbllokuar miliarda euro financime.
CNN e kaloi ditën me Bundeswehr-in në një vend të pazbuluar në Gjermaninë qendrore teksa pesë aleatë të NATO-s morën pjesë në stërvitje. Ushtrimi simulativ ishte një sulm nga një “kundërshtar i huaj” ndaj një anëtari tjetër të aleancës.
“Gjermania është komb i aftë në Evropë dhe duhet të jetë partner për kombet e tjera. Ne jemi partner i përgjegjshëm në Evropë dhe komb i madh. Ne (duhet) të rritemi dhe do ta bëjmë këtë“, thotë gjenerali Hammerstein.
Pushtimi në shkallë të plotë i Ukrainës në shkurt të 2022-ës ishte goditje sizmike për kontinentin. Lufta ishte kthyer dhe detentimi që kishte ekzistuar që nga rënia e Perdes së Hekurt kishte marrë fund.
Në Berlin, ajo filloi periudhën e njohur në gjermanisht si “Zeitenwende” – ose “pika e kthesës”. Në fakt, ishte fillimi i përpjekjeve për të rritur edhe një herë shpenzimet ushtarake.
Olaf Scholz, kancelari tashmë në largim, tha se vendi kishte nevojë për një politikë të re të mbrojtjes dhe sigurisë – dhe se Bundeswehr-i kishte nevojë për vëmendje të veçantë.
Ai krijoi një fond të vetëm 100 miliardë euro për “investime gjithëpërfshirëse” në Bundeswehr. Për ta bërë këtë, Scholz-it iu desh të ndryshonte Ligjin Bazë, kushtetutën e vendit.
Që nga mesi i epokës së Luftës së Ftohtë, shpenzimet ushtarake të Gjermanisë si përqindje e GDP-së kanë rënë në mënyrë dramatike. Duke arritur kulmin në 4.9% në 1963, ai ra në nivelin më të ulët historik në vitin 2005 prej vetëm 1.1%.
Vetëm në vitin 2024 Gjermania përmbushi pragun e NATO-s prej 2% të GDP-së për shpenzimet në mbrojtje – duke shënuar herën e parë në më shumë se 30 vite.
Hammerstein pohon se “çdo ushtri në botë, në histori dhe gjithashtu në të ardhmen, gjithmonë do të thotë se nuk ka mjaftueshëm“. Por ai e quan situatën aktuale të Gjermanisë si mbështetje në “dividendin e paqes” nga vitet e 90’a që “ishte një rënie për të gjitha ushtritë në botë, veçanërisht në Evropë“.
Ai mendon se Gjermania tani është në rrugën e duhur. Vitin e kaluar, për herë të parë, Gjermania shpenzoi përbrenda kritereve të NATO-s prej 2% të GDP-së.
Merz mund të jetë i përkushtuar për të forcuar fuqinë e parashikuar ushtarake të Gjermanisë dhe për ta vendosur mbrojtjen në një bazë më të sigurt, por një raport nga Komisionerja Parlamentare për Forcat e Armatosura, Eva Högl, sugjeroi se puna që duhej bërë ishte e rëndësishme.
I publikuar javën e kaluar, raporti nënvizonte se Bundeswehr nuk i përmbushi objektivat e rekrutimit, kishte forcë luftarake të plakur, dhe mungesë të kazermave e infrastrukturës bazë.
I pyetur se sa duhet arritur shifra e pjesëmarrësve në ushtri, Hammerstein, i cili iu bashkua ushtrisë gjermane si rekrut në vitin 1992, bëri thirrje për një periudhë shërbimi të detyrueshëm ushtarak. Gjermania e vendosi zyrtarisht pezullimin e rekrutimit më 2011-ën.
“Unë isha i bindur nga ligji për t’u bashkuar me ushtrinë. Pra, mendoj se duhet të ketë një lloj shërbimi të detyrueshëm për të rritur shifrat në mënyrën se si duam ta shohim atë”, tha Hammerstein.
Pjesa më e keqe e raportit të Komisionit Evropian erdhi me një projekt-ligj të bashkangjitur. Ai tha se 67 miliardë euro kërkoheshin për projektet e infrastrukturës dhe i përshkroi kazermat dhe pronat si “ende në një gjendje katastrofike”.
Për Hammerstein, megjithatë, nuk ka të bëjë me paratë. Ai këmbëngul se Gjermania ka një platformë të shëndoshë.
“Ka të bëjë me cilësinë dhe ajo që unë shoh këtu gjatë stërvitjes është se ne kemi një substancë të mirë. Kemi ushtarë me të vërtetë shumë të motivuar … dhe kjo më mban shumë optimist se substanca është e mirë dhe tani duhet ta rrisim atë”. /Insajderi.org/
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
