Sekretari i Partisë Demokratike të Kosovës, Betim Gjoshi, e ka kritikuar ashpër kryeministrin Albin Kurti për veprimet e tij kundëthënëse ditëve të fundit lidhur me raportet Kosovë-Serbi.

Gjoshi tha se është e pakuptimtë që Albin Kurti para një jave deklaronte se sulmet terroriste kundër Policisë së Kosovës në territorin e Kosovës po vijnë nga territori i Serbisë, ndërsa sot e ka dërguar zëvendësin e tij Besnik Bislimi në bisedime me palën serbe dhe nuk e ka përmendur fare çështjen e sulmeve.

“Ky është Kurti i vërtetë. Dialogu i është bërë prioriteti numër një dhe për të më nuk ka ndonjë turp nga dita që e ka thyer premtimin e dhënë Nënave Gjakovare se në dialog nuk do të shkojë pa u zbardhur fati i familjarëve të tyre të pagjetur. E pashpjegueshme se si Zëvendësi i Kurtit, ka qëndruar me orë të tëra në takimin me palën serbe, por ai nuk i ka ngritur si shqetësim sulmet kundër Policisë së Kosovës. Bislimi është si shefi i tij Kurti, i braktisin temat dhe çështjet me interes për Kosovën, njejtë qysh i kanë braktisur edhe premtimet për Nënat Gjakovare, hallet e të cilave nuk po i përmendin as në Bruksel dhe as në Prishtinë”, ka thënë Gjoshi përmes një reagimi në faqen e tij në Facebook.