Uber akuzohet për vjedhje të sekrete tregtare dhe teknologjisë së Google. Këto akuza vijnë nga “Waymo”, divizioni i makinave të automatizuara të Google, ndaj “Otto”, njësi e makinave të automatizuara të Uber.

Sipas padisë, ish menaxheri i Waymo, Anthony Levandowski mori me vete informacione kur u largua për të themeluar “Otto”.

Uber tha se e ka marrë çështjen shumë seriozisht dhe po e trajton atë me kujdesin më të lartë.

“Otto” u ble në Gusht të vitit të kaluar për 680 milion dollarë ndërsa shifra e dëmshpërblimeve që kërkon “Waymo” ngelet një mister.

Teknologjia e kopjuar për të cilën bëhet fjalë është LiDAR, një sistem radarësh i cili funksionon përmes dritave laser dhe ndihmon makinat të analizojnë situatën përreth.

Sipas “Waymo”, kompania kishte zbuluar 4 javë pas largimit të Levandowski-t kopjimin e 14,000 dokumenteve të dizajneve sekrete.

Ai ka shkarkuar afro 9.7GB të dhëna të cila ti ka përdorur për të themeluar “Otto”-n.

Google dhe Uber filluan si shokë, u bënë pastaj konkurrentë, ndërsa tani janë në një luftë ligjore të hidhur për të kontrolluar të ardhmen e transportit.