Prokurorja e Prokurorisë Sepciale Drita Hajdari,  ka deklaruar se numër i vogël i rasteve të dhunës seksuale, që kanë ndodhur gjatë luftës në Kosovës, janë duke u trajtuar në organet e Drejtësisë në vend.

Ajo në kuadër të Konferencës dy ditore me moton “Drejtësi dhe rimëkëmbje për viktimat”, të organizuar nga Prokuroria e Shtetit, tha se momentalisht në procedurë janë vetëm dhjetë raste.

“Sa i përket numrit të rasteve të cilat janë për momentin në procedim e që kanë të bëjnë me krimet e dhunës seksuale gjatë luftës në Kosovë, janë vetëm 10 raste, 4 prej tyre janë në Eulex dhe 6 të tjera në Prokurori”, tha prokurorja Hajdari.

Ajo ka bërë thirrje OJQ-ve që merren me këto raste, të bashkëpunojnë me Prokurorinë për t`i ndarë  informacionet me qëllim që të procedohet me lehtë me këto raste.

Nga ana tjetër Feride Rushiti nga Qendrës Kosovare për Rehabilitimin e të Mbijetuarve të Torturës ka theksuar se  vetëm qasja në drejtësi mund t’i ndihmojë viktimat të rikthejnë dinjitetin e tyre.

“Vetëm duke i atribuuar fajin ushtruesit të dhunës dhe duke bërë që të pranohet statusi i tyre si viktima dhe jo duke u ndjerë fajtore, mund tu kthehet sado pak dinjiteti këtyre viktimave”, tha Rushiti. /Insajderi.com