Deputeti, Haki Abazi, ka vendosur të garojë për një mandat të ri në Kuvendin e Kosovës në zgjedhjet parlamentare të 9 shkurtit 2025, duke u bashkuar me Aleancën për Ardhmërinë e Kosovës (AAK).

Abazi në një konferencë për media tha se vendimi i tij për të aderuar në AAK ka qenë i motivuar nga angazhimi i përbashkët me kryetarin e AAK-së, Ramush Haradinaj, për zhvillimin e vendit dhe integrimin e Kosovës në NATO.

“Mendoj që Aleanca për Ardhmërinë e Kosovës ka vizionin më të qartë, planin më të qartë, hapat e sigurt të depërtimit deri te anëtarësimi në NATO,” u shpreh ai.

Abazi falënderoi AAK-në për mundësinë dhe theksoi se ajo e gjeti “idenë e Skënderbeut me i bë thuprat bashkë e mos me u thy në këto situata shumë delikate të sigurisë”.

Ai shprehu angazhimin e tij për të qenë krahu i Haradinajt dhe i miqve të tij në AAK, përfshirë edhe kryetarin e Gjakovës, Ardian Gjini, të cilin e cilësoi si një model të udhëheqjes me dinamikë dhe reforma të mëdha.

Kryetari i AAK-së, Ramush Haradinaj, vlerësoi kontributin e Abazit në shumë etapa të rrugëtimit të partisë, duke e cilësuar si një angazhim të çmuar për shoqërinë civile dhe demokratizimin e vendit.

“Hakiu nuk ka pasur vetëm etiketë partiake, por çdoherë ka qenë i hapur për komunikim, për bashkëpunim me të gjithë ne në Parlament”, shtoi Haradinaj.