Pushtetarët e rinj të pushtetit “Krejt dhe Drejt”, kanë ndryshuar edhe stilin e jetës gjatë këtyre 18 muajve.

Janë duke preferuar më shumë edhe sportet individuale, që vlerësohen si elitare, shkruan Gazeta Insajderi.

Glauk Konjufca e ka lënë anash sportin e tij të preferuar si opozitar, basketbollin, duke i kushtuar më shumë energji sportit të tenisit. Por, jo gjithçka i shkoi mirë në preferencën e tij të re: Tenisin.

Gazeta Insajderi, merr vesh se ai e ka lënduar këmbën derisa ishte duke luajtur tenis, për çka edhe ka kërkuar ndihmë mjekësore.

Nga ana tjetër shefja e grupit parlamentar të Vetëvendosjes, Mimoza Kusari- Lila, kryeparlamentari, Glauk Konjufca për një kohë nuk do të drejtoj seancat dhe angazhimet tjera në Kuvend.

Ajo tha se me rekomandimin e mjekëve ai nuk do të dalë në punë.

“Kryetari i Kuvendit nuk do të jetë ne vendin e tij të punës ka pas një lëndim fizik mbrëmë. Do të jetë në pushim shëndetësor me rekomandim të mjekut për shkak të rikuperimit të këmbës”, tha Kusari- Lila.

Fillimisht u tha se Konjufca nuk u trajtua në Qendrën Klinike Universitare të Kosovës, për këtë e ka mohuar këshilltari i tij, Ilir Kërçeli.

“Kryetari Konjufca është trajtuar në QKUK dhe me këtë rast falënderojmë stafin e mrekullueshëm të doktorëve”, shkroi Kërçeli.