Kryetari i Aleancës për Ardhmërinë e Kosovës, Ramush Haradinaj, ka mirëpritur një propozim të ambasadorit britanik në Kosovë, Ruairi O’Connell, i cili para disa ditëve ftoi Qeverinë e Kosovës që të organizojë një debat lidhur me marrëveshjen e demarkacionit.

Sipas Haradinajt, një debat i tillë do të ishte i mirëseardhur meqë qeveria ka qenë e mbyllur deri më tani.

“Është shumë e mirëseardhur, për shkak se qeveria ka qenë e mbyllur, deri më tani, ndaj çdo lloj mendimi ndryshe, edhe ndaj ekspertizës së ekspertëve dhe ndaj mendimet ndryshe e të gjithë të tjerëve. Kësi soji, qeveria do ta bënte një veprim të mençur duke u hapur dhe duke e hapur temën për të gjithë. Pra, është diçka e dobishme, besoj”, ka thënë ai.

Haradinaj ka përsëritur edhe një here se partia e tij nuk do t’i kthehet formave jo konvencionale të kundërshtimit në Kuvend ashtu sic është vepruar para disa muajve.

Ai në një intervistë për Radio Evropa e Lirë  ka thënë se se duhet hedhur poshtë versioni aktual i marrëveshjes së demarkacionit, dhe që deri para shtatorit të gjindet një zgjidhje për këtë cështje./Insajderi.com