Kreu i Aleancës për Ardhmërinë e Kosovës, Ramush Haradinaj, ka thënë se lirimi i tre policëve të Kosovës nuk nënkupton që kjo ngjarje mund të konsiderohet e mbyllur vetëm me lirimin e tyre.

“Lirimi i tre policëve të Kosovës është lajm i mirë, para së gjithash për familjet e tyre por edhe për Kosovën, por kjo nuk nënkupton që kjo ngjarje mund të konsiderohet e mbyllur vetëm me lirimin e tyre. As Presidenti i Serbisë e as Kryeministri i Kosovës, nuk mund t’i ikin përgjegjësisë së tyre, e cila çoi në rrëmbimin e policëve dhe mbajtjen e tyre në paraburgim e pa asnjë faj për më shumë se dhjetë ditë”, ka shkruar Haradinaj në rrjetin e tij në Facebook.

Sipas Haradinajt Policia e Kosovës nuk duhet të paguajë çmim për veprimet e papërgjegjshme politike të regjimit në Serbi dhe të qeverisë në Prishtinë.

“Policia e Kosovës nuk duhet të paguajë çmim për veprimet e papërgjegjshme e kalkuluese politike të regjimit në Serbi, apo të veprimeve të papërgjegjshme të qeverisë në Prishtinë, e cila çoi në rrëmbimin e policëve të Kosovës dhe mbajtjen e tyre në paraburgim e pa asnjë faj, për më shumë se dhjetë ditë”, është shprehur Haradinaj.

Tutje Haradinaj ka thënë se lirimi i tyre është bërë i mundur falë ndërhyjrjes së diplomacisë amerikane.