Ish-komandanti i Ushtrisë Çlirimtare të Kosovës, Ramush Haradinaj, u ka bërë thirrje të gjithë bashkëluftëtarëve të tij që mos të kalojnë nëpër territorin e Serbisë.

Haradinaj ka treguar se Serbia e ka riaktualizuar përndjekjen e qytetarëve të Kosovës që kanë qenë pjesë e çlirimit të vendit, kryesisht ish pjesëtarë të UÇK-së.

Kryetari i AAK-së ka marrë shembullin e tij se si ishte ndaluar dy herë me fletarrest nga sheti serb, një herë në Slloveni dhe herën tjetër në Francë.

Shkrimi i plotë nga Haradinaj:

Të nderuar bashkëluftëtarë,

Serbia në kuadër të luftës speciale kundër vendit tonë, ka riaktualizuar përndjekjen e qytetarëve të Kosovës që kanë qenë pjesë e çlirimit të vendit, kryesisht ish pjesëtarë të UÇK-së.

Fatkeqësisht, Serbia ka arritur t’i shtrijë tentakulat e saj edhe në disa vende të rajonit si dhe po i shfrytëzon përparësitë e veta si anëtare e Interpol dhe organizatave të tjera ndërkombëtare, për ndjekje ligjore në vendet jashtë Kosovës. Një model i tillë ishte aplikuar me rastin e ndalimit tim në Francë dhe Slloveni.

Prandaj ju këshilloj që të bëni kujdes gjatë udhëtimeve tuaja.