Kandidati për kryeministër nga koalicioni AAK-PSD, Ramush Haradinaj, është zotuar para sportistëve, që Kosova do të shpallet shtet i sportit, duke investuar në përmbylljen e infrastrukturës së nevojshme, stadiume, palestra sportive, shkolla të sportit dhe në promovimin e stimulimin e talentëve.

Këto komente, Haradinaj i ka thënë teksa ka ngrënë drek me drejtuesit dhe përfaqësuesit e Federatave të sportit, si dhe me Kryetarin e Komitetit Olimpik të Kosovës, Besim Hasani.

“Drekë pune me drejtuesit dhe përfaqësuesit e Federatave të sportit në vend dhe Kryetarin e Komitetit Olimpik të Kosovës Besim Hasani, për ta prezantuar konceptin e Kosovës shtet të Sportit. Në këtë mandat, kemi jetësuar suksesshëm Ligjin për sponzorizime, i penguar dhe lënë anash për shumë vite. Kemi investuar në Stadiumin e Kombëtares së Kosovës, në Qendrën e Xhudos në Pejë dhe në dhjetëra salla sportive në gjithë vendin”, ka thënë Haradinaj.

Tutje, Hardinaj është shprehur se qeveria e tij, do të bëhet promovuese e denjë e talentëve tanë.

“Në programin tonë Qeverisës zotohemi para sportistëve tanë, që Kosovën ta shpallim shtet të sportit, duke investuar në përmbylljen e infrastrukturës së nevojshme, stadiume, palestra sportive, shkolla të sportit dhe në promovimin e stimulimin e talentëve. Sportistët kosovarë po vazhdojnë të jenë promovuesit më të mëdhenjë të Kosovës në botë dhe Qeveria Haradinaj 3, do të bëhet promovuese e denjë e talentëve tanë!”, ka përfunduar Haradinaj.