Enver Hoxhaj nga Partia Demokratike e Kosovës, ka thënë se Qeveria e Kosovës do të duhej të bënte më shumë sa i përket rastit të Thaçit dhe të tjerëve të cilët janë në një proces gjyqësor në Gjykatën Speciale të Hagës.

Ai ka thënë se të gjithë liderët dhe figurat publike do të mund të shkonin për vizitë në Hagë dhe të bënin më shumë.

“E shoh të nevojshme qeveritë kushdo qofshin ato, jo vetëm qeveria që udhëheq nga një subjekt tjetër politik dhe jo vetëm një qeveri e cila udhëhiqet nga LVV-ja ta shohin si një mbrojtje të një së drejte për të cilën historikisht shqiptarët kanë luftuar gjenerata nga gjeneratë. Z. Thaçi dhe Z. Veseli dhe të tjerët e kanë pasë fatin që të i prijnë një procesi të një luftë të drejtë çlirimtare e cila në qershorin e 1999-së për herë të parë në histori të këtij vendi, e ka bërë të këtë vend të lirë, dhe në 2008-në e ka bërë të pavarur”, ka thënë Hoxhaj.

“Kushdo që është sot kryeministër e nesër, kushdo që nga ndonjë pozitë politike, publike e intelektuale, do të duhej ta sheh betejën që e bënë Thaçi dhe Veseli si betejë të tyre personale, siç është betejë e gjithë popullit të Kosovës. Ka mundur të bëjë edhe më shumë kjo qeveri, të japë mbështetje edhe politike edhe publike më të mirëfilltë financiare”, ka pohuar Hoxhaj.