Autoritetet e Kosovës kanë ndaluar hyrjen në Kosovë drejtorit të ashtuquajturës zyre serbe për Kosovën, Petar Petkoviq.

E ashtuquajtura zyre për Kosovën ka vlerësuar se “bëhet fjalë për shkelje flagrante të marrëveshjes mbi lirinë e lëvizjes dhe marrëveshjes mbi vizitat e zyrtarëve”.

Gjithashtu kjo “zyre” kërcënon se kjo sjellje “kundër ligjore e Prishtinës” do të jetë temë e bisedimeve të ardhshme në Bruksel.

Petkoviq kishte planifikuar që sot dhe të shtunën të qëndrojë në Kosovë dhe “të vizitojë disa subjekte ekonomike ku shteti i Serbisë ka siguruar vende të reja pune”, si dhe të vizitojë disa familje “të rrezikuara nga shoqëria” dhe të dorëzojë ndihma.

“Është më se e qartë se Prishtina e filloi fushatën zgjedhore edhe para afatit zyrtar, e cila, si rregull, gjithmonë thyhet mbi kurrizin e popullit serb. Ky është ndalimi i tretë i Prishtinës ndaj drejtorit të Zyrës për Kosovën dhe negociatorit kryesor serb në dialogun teknik, dhe vjen përpara vazhdimit të dialogut midis Beogradit dhe Prishtinës javën e ardhshme në Bruksel, gjë që tregon gjithashtu edhe mosgatishmërinë e Prishtinës për normalizimi i marrëdhënieve me Beogradin”, pretendohet në një kumtesë për media të kësaj “zyreje”./Insajderi.org.