Asociacioni i Gazetarëve të Kosovës (AGK) ka shprehur shqetësimin e tij për mënyrën e zhvillimit të procesit të zgjedhjes së kryetarit të ri të Komisionit të Pavarur të Mediave (KPM).

AGK-ja ka deklaruar se ka ndjekur me vëmendje mbledhjen e sotme të KPM-së, gjatë së cilës u zgjodh Besnik Berisha si kryetar, disa ditë para skadimit të mandatit të kryetarit aktual, Jeton Mehmeti.

Në reagimin e saj, AGK-ja ka ngritur shqetësime lidhur me legjitimitetin e zgjedhjes, duke e cilësuar si një proces që ngre pikëpyetje ligjore.

“Zgjedhja e Besnik Berishës për kryetar të KPM-së ngre pikëpyetje ligjore për mënyrën e ndryshimit të Rregullores së KPM-së, e cila parasheh që kryetari i ri zgjidhet në mbledhjen e parë pasi t’i ketë skaduar mandati ose të jetë shkarkuar kryetari aktual”.

Sipas Rregullores, kryetari i ri duhet të zgjidhet vetëm pas skadimit të mandatit të kryetarit aktual, ose në rast të shkarkimit të tij.

“AGK-ja e sheh votimin e sotëm si përpjekje të hapur për politizimin dhe instrumentalizimin e KPM-së për interesa të partisë në pushtet”, thuhet në reagim, duke theksuar se Komisioni i Pavarur i Mediave duhet të ruajë pavarësinë e tij dhe të mos lejojë ndërhyrje politike.