Më shumë se 10 mijë tonë ushqime dhe një milion litra pije të falsifikuara dhe toksike janë konfiskuar në operacionet në më shumë se 57 vende, në një nismë nga Interpol-Europol koordinuar për të mbrojtur shëndetin dhe sigurinë publike.

Zbulimet në 57 vende të ndryshme të botës përfshijnë sheqer sudanez të përzier me pleh kimik dhe 85 tonë vaj ulliri italian të përzier me sulfat bakri për të përmirësuar ngjyrën, njofton Europoli.

Në Greqi, u zbuluan tre fabrika që prodhonin alkool të falsifikuar si dhe pajisje për prodhimin e etiketave false dhe shisheve boshe, si dhe rreth 7 mijë e 400 shishe me pije alkoolike dhe etiketa false.

Inspektimet janë kryer mes periudhës nëntor 2015 dhe shkurt 2016 nga policia, zyrtarët e doganave dhe organet rregullatore në dyqane, tregje, porte dhe zona industriale.

Interpoli tha se këto ishin sasitë më të mëdha të mallrave të paligjshme të kapura që kur ka filluar inspektimi i koordinuar mes agjencive pesë vjet më parë.

“Ushqimi e pijet false e të rrezikshme kërcënojnë shëndetin tonë dhe sigurinë e njerëzve në botë, të cilët shpesh pa ndonjë dyshim blejnë këto ushqime potentcalisht të rrezikshme”, tha Michael Elli, kreu i Trafikimit në Interpol.

Agjencia ndërkombëtare e policisë tha se mallrat ushqimore të fallsifikuara janë një industri disa miliarda dollarëshe që mund të përbëjnë rreziqe serioze shëndetësore për konsumatorët.

Një numër arrestimesh janë bërë në mbarë botën përmes këtij operacioni dhe Interpoli tha se hetimet po vazhdojnë në përpjekje për të identifikuar dhe ndërprerë rrjetet e krimit të organizuar që fshihen pas trafikimit të ushqimeve fallco./Insajderi.com