Në fokus të investimeve nga KEDS për vitin 2016, ka qenë edhe Podujeva dhe fshatrat e saj. KEDS në këtë rajon ka zbatuar projekte të mëdha investive të cilat drejtpërdrejt ndikojnë në furnizim kualitativ e stabil për ekonomitë familjare dhe biznesore në këto anë.

KEDS ka përfunduar projektet në vendet si Letanci, Perani 2, Katunishta, Batllava, në lagjet boshnjakët, ashkalinjtë, Zymerovitët dhe Bajraktarët. Mirëpo kompania pret të vazhdoj të punojë ende sipas dinamikës së planit.

Për investimet dhe punën që KEDS ka bërë në këtë rajon, është deklaruar edhe Kryetari i komunës së Podujevës Agim Veliu.

“Ne jemi të kënaqur me investimet që po bënë KEDS dhe i mirëpresim ato. Podujeva ka nevojë për investimet që përmirësojnë jetën e qytetarit, në këtë rast konsumatorit. Disa shqetësime kanë qenë me rënien ndesh me planin urbanistik të qytetit e të cilat do tejkalohen”, deklaron kryetari Veliu

Në KEDS kanë sqaruar qëllimin e investimeve në fjalë, duke pohuar se edhe projekte të tjera siç janë ai në Bradash, Dumnicë, rrugën ‘Skënderbeu’ dhe të tjerë do të vazhdojnë.

Sipas zëdhënësit të KEDS, Viktor Buzhala, qëllimi i investimeve është zvogëlimi i humbjeve teknike dhe furnizimi sa më kualitativ  i konsumatorëve me energji elektrike. Ku në këtë kuadër janë shtrirë edhe investimet e standardit të lartë.

Se investimet do të vazhdojnë edhe në rajonet e sipërpërmendura dhe rajone ku do të ketë nevojë, e konfirmon edhe kryetari i Podujevës Veliu.

“Së shpejti ne do kemi takime me përfaqësuesit dhe inxhinierët nga Kompania Kosovare për Distribuim dhe Furnizim me Energji Elektrike. Aty do ti shtrojmë çështjet dhe planet se si do të vazhdojmë me prioritetet të cilat do të jenë konform urgjencave dhe kërkesave të konsumatorëve të kësaj ane”, është shprehur Veliu.

Investimet e realizuara në këtë vend dhe ato që pritet të ndodhin, zhvillohen në kuadër të Planit Zhvillimor të Rrjetit të Shpërndarjes, Master Plani i rinovimit të rrjetit elektrik në tërë Kosovën, sipas të cilit KEDS planifikon të investoj 300 milion euro deri në vitin 2025.