Gianluca Vialli, legjendë e futbollit italian, beson se Shqipëria mund të jetë një prej befasive në “Euro 2016”.

Për më tepër, ai është treguar shumë i guximshëm në parashikimin e tij, duke thënë se Shqipëria mund ta fitojë krejt Evropianin.

Ish sulmuesi i njohur italian beson se gara në Francë mund të sjellë një kampion të papritur, njësoj si triumfi i befasishëm i Leicester Cityt në Ligën Premier.

“Besoj se do të jetë viti i një skuadre më të vogël. Nuk do të isha i befasuar nëse një ekip më i vogël arrin të shkojë deri në fund, dhe nëse jo të fitojë në fund, atëherë të arrijë në finale”, tha Vialli për goal.com.

Në mesin e skuadrave që mund të befasojnë në “Euro 2016”, Vialli ka përmend edhe Kombëtaren e Shqipërisë.

“E kam fjalën për Shqipërinë, e kam fjalën për Uellsin ose Republikën e Irlandës e Austrinë, një ekip i papritur që mund të shkojë larg”, përfundoi ai.

Shqipëria gjendet në Grupin A ku për kundërshtar do të ketë nikoqirin Francën, Zvicrën dhe Rumaninë.