Kryetari i Partisë së Serbëve të Kosovës, Aleksandar Jabllanoviq, është takuar me ambasadorët e Britanisë së Madhe dhe të Suedisë në Kosovë.

Sipas njoftimit të partisë, ata kanë biseduar për veriun dhe zgjedhjet e ardhshme parlamentare.

“Përfaqësuesit e partisë serbe të Kosovës kanë zhvilluar një takim me ambasadorët e Britanisë së Madhe, Jonathan Hargreaves dhe Suedisë, Jonas Westerlund në Kosovë. Në takim u shkëmbyen mendime dhe informacione për situatën aktuale politike dhe të sigurisë në Kosovë, me theks të veçantë për veriun e Kosovës”, thuhet në njoftim.

“Theksuam se është e nevojshme që qeveria e Kosovës të respektojë obligimet e marra nga dialogu i Brukselit dhe të formojë Asociacionin pa kushte”.

“Si hap inkurajues shohim interesimin e ambasadave të Britanisë së Madhe dhe Suedisë për problemet e qytetarëve dhe idetë e përfaqësuesve politikë të serbëve në Kosovë”, përfundon njoftimi.