Shef i Repartit të Gjinekologjisë në Spitalin e Vushtrrisë, Blerim Feka ka dhënë dorëheqje nga pozita e tij dhe nga detyra e mjekut në këtë spital, pas përplasjes verbale me familjarin e një pacienti.

Lajmin e ka konfirmuar Drejtoria e Spitalit të Vushtrrisë, përmes një përgjigjeje me shkrim.

“Dr. Blerim Feka, ka dhënë dorëheqje të parevokueshme nga detyra e mjekut specialist dhe e ka njoftuar Spitalin për shkëputjen e Kontratës së punës për arsye personale”, thuhet në përgjigjen e tyre.

Kujtojmë se, në një video-incizim që është shpërndarë në rrjetet sociale, doktori Blerim Feka shihet duke debatuar ashpër me familjarin e një pacienti, i cili kërkon që ta lejojë ta shohë fëmijën e tij të sëmurë. Sipas qytetarit, mjeku gjinekolog nuk ka pasur sjellje të hijshme karshi gruas së tij, e cila i është drejtuar Fekës për komunikim dhe i njëjti dyshohet të ketë bërtitur nëpër spital.

@insajderitv Përplasje mes familjarit dhe shefit të Gjinekologjisë në Vushtrri #vushtrri #insajderi #insajderitv ♬ original sound – Insajderi

Pas raportimit të mediave, ka reaguar edhe Shërbimi Spitalor Klinik dhe Universitar i Kosovës.

ShSKUK ka kërkuar nga spitali të merren masa urgjente ndaj mjekut konform të gjeturave dhe legjislacionit në fuqi.