Kandidati për kryeministër nga Lidhja Demokratike e Kosovës (LDK), Lumir Abdixhiku, ka shpalosur vizionin ambicioz për Prishtinën, duke premtuar përfundimin e një sërë projektesh brenda një mandati.

Ai tha programi i tij përmban investime prej 5 miliardë eurosh, të cilat synojnë ta kthejnë Kosovën në një vend evropian.

“Kam paraparë 5 miliardë euro investime që të ndryshojmë këtë strukturë të stërvjetëruar që duket pak si Evropë pak si Kandahar, por që janë pjesë e një shoqërie shumë vibrante që mund të të bëjë jetë shumë më të mirë.” – tha Abdixhiku.

I pyetur se si do të duket Kosova nga maja e Katedrales në Prishtinë pas katër vitesh me LDK-në në pushtet, Abdixhiku renditi një sërë projektesh madhore që synon t’i realizojë:

“E para, stadiumet e reja do të jenë të përfunduara brenda katër viteve. Jo vetëm stadiumi i ri kombëtar, do të jetë edhe Pallati i ri Kombëtar. Pallati, bashkë me stadiumin, bashkë me Pishinën Olimpike, do të vendosen në Bernicë, në hapësirë 64 hektarëshe. Do të ketë një Spital të ri, të cilin mund ta vizitojmë, që i ka 150 mijë metra katrorë. Do të vizitojmë qendrat kulturore, Teatrin e ri Kombëtar, do të vizitojmë Teatrin e Operas dhe Baletit, do të vizitojmë Muzeun e Paqes dhe Rezistencës. Do të vizitojmë Muzeun e Artit Bashkëkohor. Do t’i kemi të gjitha rrugët, prej Prishtinës në Mitrovicë, Prishtinë-Podujevë, Prishtinë-Pejë dhe autostradën e Anamoravës të përfunduara. Do të kemi një Park Teknologjik që punëson mbi 35 mijë të rinj aty. Pra, për këto, unë i kam të parapara brenda programit dhe kam vizionin e qartë se si do të arrijmë deri aty. Pra, jam i bindur dhe kam shumë energji për t’i bërë ato punë.” – tha Abdixhiku.