Kryeministri i Kosovës, Isa Mustafa është penguar të lëvizte lirshëm në veri të Kosovës, nga qytetarët serbë të kësaj pjese të Kosovës, të cilët kanë penguar lëvizjen e kryeministrit përmes një kamioni në rrugën magjistrale Zveçan-Leposaviq, në fshatin Rudarë.

Siç shkruan agjencia serbe e lajmeve Tanjug, gjatë përurimit të një ure të ndërtuar nga KFOR-i mbi lumin Bistrica, që lidhë qytetet e Zveçanit dhe Leposaviqit, qytetarët serbë të Kosovës kishin bllokuar rrugën në fshatin Rudarë, duke vendosur një kamion në rrugë, raporton Insajderi.

Isa Mustafa është dashur që të përdor rrugë alternative pasi që rruga kryesore ishte e bllokuar.

Komandanti i KFOR-it, gjenerali Giovanni Fungo ka thënë se ura e ndërtuar është projektuar nga një kompani serbe në Kosovë, ndërsa ndërtimi i saj është bërë nga një kompani kosovare. /Insajderi.com