Kandidati i Lidhjes Demokratike të Kosovës për deputet, Ardian Olluri, ka vizituar varrezat në nderim të dëshmorëve të fshatit Krojmir, duke kujtuar luftën dhe sakrificën e katër dëshmorëve që dhanë jetën për lirinë e Kosovës.

Në këtë vizitë, Olluri ka qenë i shoqëruar nga Kryetari i komunës së Lipjanit, Imri Ahmeti, dhe bashkëpunëtorë të tjerë.

Ata kanë bërë homazhe pranë pllakës përkujtimore dhe kompleksit memorial “Katër Dëshmorët” në fshatin Krojmir, për të nderuar rënien e Halil Metës, Enver Ollurit, Isa Ollurit dhe Qamil Ollurit, të cilët humbën jetën gjatë luftës për çlirimin e Kosovës.

Olluri tha se dëshmorët e Krojmirit janë krenaria e Kosovës dhe motivi për të vazhduar punën për përparimin e vendit.

“Dëshmorët janë krenaria dhe motivi ynë për të punuar pandalur për Kosovën, për të cilën ata u flijuan,” ka thënë ai, duke shtuar se këta heronj janë një burim i pashterrshëm force dhe angazhimi për të ardhmen e Kosovës.

Në këtë përvjetor të 26-të të rënies së dëshmorëve të fshatit Krojmir, Olluri ka theksuar se kujtimi për ta do të mbetet i paharruar dhe do të jetë gjithmonë një inspirim për gjeneratat që vijnë.