Kombëtarja spanjolle është në pritje të gjysmëfinales së Kampionatit Evropian. Pengesa e tyre e fundit para finales është Franca dhe ndeshja do të luhet të martën në orën 21:00. Skuadra udhëhiqet nga kapiteni Alvaro Morata, i cili shënoi një gol në këtë kampionat.

Megjithatë, pavarësisht se sa mirë luajti Spanja dhe se duket se janë favoritët kryesorë për të fituar, padyshim që jo të gjithë janë të kënaqur dhe disa planifikojnë të largohen nga kombëtarja pas turneut, siç la të kuptohet Morata në një intervistë për gazetën spanjolle El Mundo.

“Është një mundësi për të cilën nuk dua të flas shumë, por është e mundur. Nuk jam i pakënaqur, por është e vështirë për mua të jem i lumtur në Spanjë, diçka del gjithmonë. Unë jam më i lumtur jashtë vendit, njerëzit më respektojnë atje, dhe në Spanjë nuk ka respekt për askënd dhe asgjë” – filloi ai, dhe më pas dha një shembull specifik:

“Ata thanë se kam qarë për shkak se mora karton të verdhë, gjë që nuk është e vërtetë.  Qava sepse skuadra doli në gjysmëfinale dhe unë jam kapiten. Unë kurrë nuk mund të kritikoj dikë që qan për kombëtaren. Megjithatë, po mundohem ta shijoj këtë turne, aq më tepër që këto mund të jenë ndeshjet e mia të fundit për kombëtaren. Çdo ditë fundi po afrohet dhe prandaj qaj, prandaj do të qaj për çfarëdo”.

Ai iu referua shkurt kundërshtarit të radhës, Francës:

“Ata janë skuadra më dominuese fizikisht në Evropë, por ne kemi një plan taktik, ata nuk do të jenë të lumtur që luajnë kundër nesh”.