SHBA duhet të përgatitet për të zgjeruar forcën e saj bërthamore për të frenuar kërcënimet në rritje nga Kina, Rusia dhe Koreja e Veriut. Kështu kanë bërë të ditur zyrtarë të lartë të administratës së Biden. Vendimet nëse do të vendosen më shumë armë bërthamore i janë lënë administratës së ardhshme Trump, e cila ende nuk i ka përcaktuar planet e saj të mbrojtjes, citon Wall Street Journal.

Gjatë mandatit të tij të parë në detyrë, Trump miratoi të gjitha programet kryesore të armëve bërthamore që trashëgoi nga administrata e Obamës dhe shtoi dy sisteme të reja bërthamore.

Politika e administratës Biden është e kodifikuar në “Udhëzimin e saj për Planifikimin e Punësimit të Armëve Bërthamore” dhe vjen ndërsa Kina po vazhdon me ritme të të mëdha investimet për armët bërthamore, ndërsa Rusia po pengon bisedimet për kontrollin e armëve dhe Koreja e Veriut po rrit arsenalin e saj të armëve bërthamore. 

Kjo direktivë shumë e klasifikuar, e cila u nënshkrua nga Presidenti Biden në fillim të këtij viti, udhëzon Pentagonin të zhvillojë opsione për të penguar njëkohësisht agresionin nga Kina, Rusia dhe Koreja e Veriut, thekson Ëall Street Journal.

Politika e Bidenit, thonë zyrtarët e administratës amerikane, thekson rëndësinë e zhvillimit të sistemeve të avancuara jo bërthamore dhe thellimit të bashkëpunimit ushtarak me aleatët në Azi dhe Evropë për të përballuar rreziqet e mundshme. Pentagoni, megjithatë, po përgatit gjithashtu opsione për të vendosur më shumë koka bërthamore nëse këto përpjekje rezultojnë të pamjaftueshme, duke pasur parasysh mundësinë e pengesave të kontrollit të armëve dhe vonesave të mëtejshme në vënien në terren të gjeneratës së ardhshme të sistemeve bërthamore amerikane.

Një raport i deklasifikuar mbi udhëzimin për zhvillimin bërthamor që do t’i dërgohet Kongresit të premten nuk përshkruan opsione specifike në shqyrtim, por vë në dukje se “mund të jetë e nevojshme të përshtatet aftësia, qëndrimi, përbërja ose madhësia aktuale e forcës bërthamore të SHBA” për t’u marrë me “Kundërshtarë të shumtë që po i bëjnë armët bërthamore më qendrore në strategjitë e tyre të sigurisë kombëtare.” (A2 Televizion)