Në redaksinë e Insajderit sot në orët e hershme të mëngjesit kanë arritur informacione se një rrahje ka ndodhur në Kompaninë Rajonale të Mbeturinave “Pastrimi”. Por e vërteta na u tha se qëndron ndryshe. Kryeshefi i kësaj kompanie, Petrit Reçica ka dhënë detaje për Insajderin.

Reçica ka mohuar të ketë pasur rrahje, por ka konfirmuar se ai është kanosur nga një zyrtar i kësaj kompanie.

N.G dyshohet se e ka kanosur Reçicën dhe ky i fundit e ka denoncuar në Polici. Ndaj të njëjtit tashmë kanë nisur hetimet.

“Referuar pyetjes suaj, ju lutem të keni kujdes nga keqinformimi apo dashakeqësia e kujdo që t’u lëshojë në lajthitje me informatat në lidhje me ngjarjen.  Bazuar në pyetjet tuaja, e vërteta qëndron ndryshe dhe si në vijim: KRM “Pastrimi” ju njofton se me datën 31/05/2024, Kryeshefi ekzekutiv Petrit Reçica ka denoncuar në Polici të Kosovës – Stacioni nr.4 (tek ish hotel Victory), zyrtarin N. G. për kanosjen e Reçicës, të njëjtën ditë”, ka thënë Reçica.

“Bazuar në informatat rreth rastit, me urdhër të Prokurorit të Shtetit është hapur rast penal ndaj N.G., dhe janë ndërmarrë të gjitha masat e para hetimore”, tha ai.

Gazeta Insajderi për rastin detaje ka kërkuar edhe nga Policia e Kosovës por të njëjtit nuk kanë kthyer përgjigje.

Insajderi do t’ju mbajë të informuar lidhur me rastin…