Autoritetet kineze kanë propozuar ndalimin e transferimit të dhunshëm të teknologjisë dhe “ndërhyrjen” e paligjshme të qeverisë në operacionet e kompanive të huaja, të cilat janë dy praktika që janë në thelbin e një mosmarrëveshje tregtare me Shtetet e Bashkuara të Amerikës.

“Autoritetet zyrtare dhe zyrtarët e tyre nuk do të përdorin mjete administrative për të transferuar me forcë teknologjinë,” thotë projektligji, sipas Reuters.

Drafti gjithashtu parasheh që Kina të mbajë të drejtën për të marrë “masa të përshtatshme” për hakmarrje ndaj vendeve që diskriminojnë investimet kineze, transmeton KosovaPress.

Projektligji, i pari i këtij lloji, iu dorëzua Komitetit të Përhershëm të Kongresit Popullor Kombëtar, i cili filloi të dielën për të mbajtur konsultime publike deri më 24 shkurt.

Pas miratimit, ligji do të zëvendësojë tri ligjet ekzistuese që qeverisin biznesin e ndërmarrjeve të përziera dhe ndërmarrjeve në pronësi të plotë të huaj.

Projektligji për investimet e huaja vjen në një kohë kur Kina po përpiqet të zgjidhë një mosmarrëveshje të gjatë me SHBA, duke akuzuar Pekinin për praktikat e padrejta tregtare, por gjithashtu vjedhjen e pronësisë intelektuale dhe transferimin e saj të detyruar.

Ndërsa hodhi poshtë akuzat e tilla, Kina ka premtuar të përmirësojë qasjen e tregut për investitorët e huaj dhe të mbrojë më mirë të drejtat e tyre në rast të ankesave në rritje dhe investimeve të huaja më të dobëta.