Këshilli i Mediave të Shkruara të Kosovës (KMShK) e ka vlerësuar si të pa bazuar, duke mos e miratuar, ankesën e kompanisë “Beni Dona Plast SH.P.K” ndaj hulumtimit të Gazetës Online Reporteri.net me titullin “Ushqim i vobektë për Policët, tender gati milionësh për “Beni Donën” e biznesmenit të afërt me LDK-në”, i publikuar më 29 shtator 2021.

Ankuesi, në këtë rast kompania “Beni Dona” pretendonte se shkrimi është kontradiktor dhe se janë shkelur Kreu I, Kreu II dhe Kreu VII i rregullores së KMShK-së.

Megjithatë, këta të fundit, pasi kanë analizuar dhe trajtuar ankesën, kanë dalë në përfundim se media, në këtë rast Gazeta Online Reporteri.net, në hulumtimin“Ushqim i vobektë për Policët, tender gati milionësh për “Beni Donën” e biznesmenit të afërt me LDK-në“, “ka përfshirë në shkrim të gjitha provat e nevojshme, për t’i ofruar publikut një hulumtim gjithëpërfshirës përkitazi me temën”.

“Media nuk ka raportuar në mënyrë tendencioze. Shkrimi i publikuar nuk përmban kontradikta brenda, por jep një pasqyrë të qartë për mënyrën e furnizmit të policisë me ushqim nga kompania në fjalë”, thuhet nder tjera në vendimin e KMShK-së që u bë publik të hënën.

“Pas leximit të ankesës KMShK gjen se ankesa është e pa bazuar. Pra, ankesa nuk miratohet”.

Pas leximit të ankesës, KMShK gjeti se ankesa e Ikballe Berisha Huduti po ndaj Gazetës Online Reporteri.net, për artikullin titullin ““Sunitët e shiitët”, ndarja e madhe në Islam që ndihet edhe në Kosovë” i publikuar me 27 gusht 2021, është e pabazuar dhe nuk u miratua.

Ankuesja pretendonte se në shkrimin e publikuar, e njëjta nuk është cituar drejtë ashtu siç ajo e ka përcaktuar në intervistën e dhënë. E njëjta prentendonte se në disa pjesë i janë hequr fjalët që ajo ka pas për institucionin e Bashkësisë Islame në Kosovë, dhe sipas saj është ndryshuar deklarimi i saj. Po ashtu ankohet se në disa pjesë të shkrimit janë përdorur fjalë të gabuara kur i është referuar fesë islame.

Derisa, KMShK pas leximit të shkrimit dhe argumenteve të paraqitura, “vendos që ankesa është e pa bazuar, pasi që është në politikën redaktoriale të përdorë komplet intervistën apo një pjesë të saj për qëllime të shkrimit. Po ashtu është politik redaktoriale nëse një pjesë të citatit e ndërprenë, pasi që i njëjti mund të jetë shumë i gjatë dhe të mos përkoj me temën. Pavarësisht që i intervistuari mund ta njeh mirë çështjen për të cilën po trajton media, prapë se prapë i intervistuari nuk ka të drejtë të përzihet në politikën redaktorialë se si citohet apo se si shkruhet për një çështje të caktuar”.

Ndryshe, KMShK ka njoftuar se në formë të kombinuar, fizike dhe online, Kuvendi i Këshillit të Mediave të Shkruara të Kosovës (KMShK) ka mbajtur mbledhjen e radhës. Në mbledhja janë shqyrtuar gjithsej 22 ankesa, nga të cilat janë miratuar 12, një është miratuar pjesërisht, gjashtë ankesa janë hedhur poshtë, kurse tri kanë qenë të patrajtueshme.

Po ashtu, anëtarët e Kuvendit të KMShK-së kanë diskutuar edhe për ndryshimet, respektivisht plotësimet në Kodin e Etikës dhe në statutin e organizatës.

Pothuajse në çdo aksion që zhvillojnë Njësitë Speciale të Policisë së Kosovës del në pah shujta e varfër e cila atyre u servohet. Njëjtë ndodhi edhe në ditët e para të aksionit që po zhvillojnë Njësitë Speciale të Policisë së Kosovë në veri të vendit, të cilët tash e 9 ditë po qëndrojnë atje në zbatim të vendimit të Qeverisë së Kosovës për reciprocitetin në targa nga Serbia.

Një rriskë gjedhi, gjysmë buke, një shishe e vogël ujë, një pije tjetër, një kek i vogël dhe një mollë, është krejt çka përmban shujta e policëve elitë të Kosovës dhe e cila u shërbehet atyre dy herë në ditë, derisa ata qëndrojnë me orë të tëra në terrene të vështira e problematike.

E për shujtën e tyre shteti llogaritet se paguan diku rreth 10 euro në ditë kompaninë “Beni Dona Plast” në pronësi të biznesmenit llapjan Ragip Mustafa. Kompani kjo e cila ka më shumë se 15 vjet që e ‘ushqen’ Policinë.

Kompania e Ragip Mustafës, biznesmenit që konsiderohet i afërt me ish-kryetarin e LDK-së Isa Mustafa, jo më larg se në fillim të vitit të shkuar e ka marrë tenderin për furnizim me ushqim të pjesëtarëve të Policisë me vlerë totale të ofertës 944 mijë e 150 euro e 80 cent. Kontratë e tenderuar kjo nga Policia e Kosovës e vlefshme për 3 vite.

Por ky tender që nga fillimi nuk kishte nisur mbarë dhe ishte përcjellë më shumë zhurmë shkruan Gazeta Online “Reporteri.net”.

Policia e Kosovës që në atë kohë drejtohej nga Rashit Qalaj, pati marrë vendim që ta anulojë vendimin për dhënien e tenderit kompanisë “Beni Dona”.

Vendimi i datës 16 janar të vitit 2020-të, i Autoriteti Kontraktues, në këtë rast i Policisë së Kosovës, e pati kthyer lëndën në rivlerësim, duke i renditur një varg ankesash për kompaninë “Beni Dona”.

Tenderi i quajtur “Furnizim me ushqim për PK-në-Ri-Tender” ishte planifikuar t’i kushtojë Policisë së Kosovës hiç më pak se 1 milion e 140 mijë e 16 euro e 40 cent. Megjithatë, kompania “Beni Dona Plast” Sh.P.K kishte ofertuar në këtë tender me çmim 944 mijë e 150 mijë euro gjë që e nxori fitues të tenderit me çmimin më të ulët të ofertuar.

Policia e Kosovës, kishte marrë vendim që ta anulonte vendimin për tender dhe që lënda të kthehet në rivlerësim bëri që dikur kompania “e parapëlqyer” e Policisë së Kosovës të nxirrte kthetrat.

Kjo kompani atëbotë nisi një sërë ankesash tek “Gjykata e Tenderëve”, nga e cila më vonë mori përkrahjen.

Organi Shqyrtues i Prokurimit (OSHP) urdhëroi për të dytën herë Policinë e Kosovës që ta rivlerësoj këtë tender duke ia bërë me dije edhe nenet e Ligjit të Prokurimit Publik që duhej të respektoheshin.

Mangësitë e furnizimit me ushqime, sipas Policisë

Policia e Kosovës në shkresat e saj zyrtare i kishte renditur mangësitë e kompanisë “Beni Dona Plast” të cilat pamundësojnë realizimin e një kontrate të mirëfilltë.

“Operatori Ekonomik ankues “Beni Dona Plast: SH. P.K në kërkesën për rishqyrtim të datës 03/09/2019 si dhe në kërkesën për rishqyrtim të datës 25/11/2019 në këto kërkesa për rishqyrtim citon: Ndërsa sa i përket lëngut të pemëve tetrapak 500 ml, i cili kërkohet gati në të gjitha pakot e specifikuara në dosjen e tenderit për cilin toni se nuk gjendet në treg, ky lëng mund të shërbehet me dy paketime nga 250 ml që do të jetë një shërbim më i mirë dhe më i pëlqyer për konsumatorët të cilin njërin paketim ta konsumojë menjëherë ndërsa tjetrin të lënë sipas nevojës për më vonë. Gabimet specifike teknike janë konfirmuar edhe nga komisioni i hartimit të specifikave teknike në vijim do të paraqesim të gjitha gabimet në specifika teknike për secilën pako/pozicion”, thuhet ndër tjera në ankesën e Policisë.

“Beni Dona Plast” u ankua që Autoriteti Kontraktues, në këtë rast Policia e Kosovës, ka shkelur nenin 1, 2, 6, 59, 62 dhe 105 të Ligjit të Prokurimit Publik si dhe nenet 40,41 dhe 44.5 të RROUPP-S, të cilat shkelje i kishte vërtetuar edhe Paneli Shqyrtues i Organit Shqyrtues të Prokurimit (OSHP).

E kështu OSHP e urdhëroi Policinë e Kosovës ta zbatojë vendimin e saj, përkundër ankesave të Policisë ndaj kompanisë “Beni Dona”, në pronësi të biznesmenit që dikur në hulumtimet gazetareske konsiderohej i “papërgjegjshëm” pasi kompania e tij ishte shpallur e papërgjegjshme dhe pretendohej se ka bërë ndërtime ilegale në këtë komunën e Prishtinës, gjatë qeverisjes së mikut të tij Isa Mustafës në kryeqytet.

“Obligohet, autoriteti kontraktues, Policia e Kosovës, që të zbatojë vendimin e OSHP-së me numër: PSH.nr.604/19, i protokolluar me datë 23.10.2019, përkitazi me aktivitetin e prokurimit me titull ‘’furnizim me ushqim për PK-në Ritender, rivlerësim, të iniciuar nga Autoriteti Kontraktues-Policia e Kosovës”, thuhet në urdhëresën e OSHP-së.

Megjithatë, javën që shkoi Policia e Kosovës e ka arsyetuar dhënien e tenderit për “Beni Dona Plast”, që dikur e kundërshtonin. Madje, në përgjigjën e Policisë për Gazetën Online Reporteri.net theksohet se i kushtojnë rëndësi të veçantë furnizimit me ushqim për zyrtarët policorë, “duke përfshirë përmbajtjen, kualitetin, kalorinë dhe pakot e ushqimeve, andaj lidhur me këtë nuk ka pasur asnjë ankesë zyrtare”.

PK thekson se kompania e Ragip Mustafës ka patur çmimin konkurrues më të lirin në treg.

“Referuar kërkesës suaj ju informojmë se, Policia e Kosovës të gjitha procedurat rreth kontratës afatgjate në fjalë, ndër vite i ka realizuar konform autorizimeve dhe procedurave të parapara ligjore. Kontrata është lidhur me procedurë të hapur sipas ligjit për prokurimin publik, konkurrues me çmimin më të lirë sipas cilësisë dhe kritereve të kërkuara nga ana e PK-së”, thuhet në përgjigjen e Policisë.

“Vlen të potencohet se kontrata është publike, e publikuar në ëeb faqen e KRPP-së siç janë të publikuara edhe të gjitha kontratat tjera, të cilës mund ti referoheni”, thonë PK nder tjera.

“Kurrgjë nuk është shujta gjatë aksioneve, çka është ushqimi i përditshëm”

Gazeta Online Reporteri.net, gjatë javës së shkuar, në kushte anonimiteti ka biseduar me disa nga pjesëtarët e NJSO të PK-së, rreth kushteve se si ushqehen ata në “mensën” e “Beni Dona” në lagjen Ulpiana të Prishtinës.

Në bisedat me ta është vërejtur se jo veç shujta e operacioneve të gjata policore është shqetësuese për ta, por në përgjithësi ajo çka ju ofrohet atyre në këtë “mensë” nga kompania fituese e tenderit.

“Kurgjo nuk është shutja gjatë aksioneve, cka është keq ushqimi i përditshëm”, i tha një pjesëtarë i policisë gazetës, duke treguar se shpesh ka patur iniciativa për bojktotim të ushqimit.

I kontaktuar nga Gazeta Online Reporteri.net, biznesmeni Ragip Mustafa nuk është paraqitur në telefon, përkundër disa insistimeve.

Në një nga thirrjet në telefonin e tij personal është paraqitur një person i cili ka thënë se Mustafa ndodhet jashtë Kosovës dhe telefonin ia ka lënë atij.

“Kush e kërkoi Ragipin? Nuk është në Kosovë, është në Shqipëri deri të martën”, ka thënë personi që është paraqitur si punëtor i kompanisë.

Biznesmeni nga Llapi, Ragip Mustafa, nuk është i panjohur për shumë kë. Sidomos për afërsinë e tij më LDK-në. Në veçanti me ish-kryetarin e saj, Isa Mustafën. Gjatë periudhës kur ky i fundit e drejtonte kryeqytetin, Ragip Mustafa me bizneset e tij konsideroheshin përfitues të mëdhenj të tenderëve në komunën e Prishtinës.

Isa Mustafa dhe biznesmeni Ragip Mustafa, ndonëse kanë të njëjtin mbiemër nuk janë kushërinj mes vete.