Ishin bërë gati që në ora 11:00 gurthemelin e shkollës ekonomike “Isa Boletini”, në Podujevë, t’ia vendosin ‘i madh e i vogël’ nga qeveria dhe komuna.

Albin Kurti, Arbërie Nagavci, Shpejtim Bulliqi, pesë deputetë të Lëvizjes Vetëvendosje nga Podujeva, dhe kush jo tjetër nga zyrtarët e shtetit u përgatitën që ta vendosin betonin e një projekti 2.5 milionë euro, i cili edhe sipas vendimit të Gjykatës është i kundërligjshëm.

Pas dështimit të vënies së gurthemelit ka reaguar Komuna e Podujevës, ata thanë se nuk janë njoftuar me kohë nga Gjykata për pezullim të punimeve.

“Arsyeja e shtyrjes së kësaj ceremonie është një vendim i Gjykatës Komerciale, e cila e ka pezulluar përkohësisht ekzekutimin e kontratës lidhur me ndërtimin e këtij objekti. Kontrata për ndërtimin e objektit të Shkollës së Mesme Ekonomike është nënshkruar më 27 maj. Ndërkohë, edhe pse vendimi i Gjykatës Komerciale është marrë më 30 maj, ky institucion nuk e ka njoftuar asnjëherë Komunën e Podujevës me vendimin e saj. Ky vendim i është dërguar nga operatori ekonomik ankues kabinetit të kryetarit të Komunës, z.Shpejtim Bulliqi mbrëmjen e së premtes, por jo edhe nga Gjykata Komerciale“, thuhet në reagim.

Gazeta Insajderi raportoi të premten se fitues i tenderit ishte një person i afërm me kryetarin e Podujevës, Shpejtim Bulliqi. Kompania e Shaip Shabanit, u zgjodh fituese e tenderit, ani se ishte me çmim shumë më të lartë. Për këtë Insajderi kishte nisur raportimin në mars të këtij viti.

Pas raportimit, institucionet e drejtësisë kanë nisur hetimet. Në vendimin e Gjykatës Komeraciale, vendim të cilin e ka siguruar Gazeta Insajderi, është shtyrë vendimi i OSHPS-së për dhënien e tenderit 2.5 milionë euro për kompaninë duke e detyruar Komunën e Podujevës që ta pezullojë zbatimin e kontratës.

”Për arsyet e shtjelluara detajisht nè padi, i propozon gjykatës që konform nenit 22 par. 6 dhe 7 te LKA-së të marr aktvendim më të cilin aprovohet në tërèsi si e bazuar kërkesa e paditësit ARAD 94 shpk për shtyerje të ekzekutimit të vendimit PSH.Nr.2024/0201 i datës 03.05.2024, t& shtyhet ekzekutimi vendimit PSH.Nr.2024/0201 i datës 03.05.2024 deri në marrjen e publike nr.615-23-3422-5-1-1/C997, deri në nxjerrjen e një tjetër vendimi gjyqësor. Detyrohet Komuna e Podujevës që menjëherë pas pranimit të këtij aktvendimi të pëzulloj ekzekutimin e kontratës publike“, thuhet në vendim.

Ky vendim ia pamundësojë edhe kryeministrit Albin Kurti, bashkë me me zyrtarët tjerë që ta përurojnë nisjen e këtij projekti. Ani se gjithçka ishte bërë gati të shtunën.

Birra, mish e këngë- Bulliqi në shoqëri të biznesmenit që mori 2.5 milionë euro nga Komuna e Podujevës

Me 25 prill të vitit 2023, ishte hapur tenderi për ndërtimin e shkollës ekonomike “Isa Boletini” në Podujevë. Komuna për këtë projekt kishte vendosur vlerën e parashikuar prej 2 milionë euro.

Për këtë projekt kishin garuar nëntë kompani dhe grupe kompanish.

Por, edhe pse kishte kompani garuese që ofronin çmim më të lirë, komuna kishte konsideruar që ato nuk i plotësojnë kushtet dhe fitues u zgjodh grupi “Konstruktori ING 1969” & “Flori eng” NGA Prishtina, me vlerë të ofertës 2,565,696.26 euro

Në muajin gusht të 2023-tës, ishte marrë vendimi për pezullimin e aktivitetit të prokurorimit.

Pasi që kompania “Grandelite L.L.L” dhe “Arad 94”, nuk ishin pajtuar me vendimin e Komunës kishin parashtruar ankesë në OSHP. Lënda kishte shkuar në rivlersim.

Por, për të dytën herë, me 22 shkurt, fituese ishte zgjedhur kompania “Konstruktori ING 1969” dhe “Flori eng”, me vlerë të ofertës prej 2 milionë e 565,696.26 euro.

Pra, gjysmë milion euro është çmimi i tejkaluar krahas vlerës së parashikuar të kontratës, të cilën komuna ka nënshkruar kontratë për ndërtimin e shkollës.

Ani pse, kriter kryesor i dhënies së tenderit ishte “çmimi më i ulët”.

Pronar i njërës kompani fituese është biznesmeni Shaip Shabani. Shabani është pronari i kompanisë “Konstruktori ING 1969”.

Shaip Shabani ishte parë gjatë një ‘neje’ në një tavolinë me kryetarin Shpejtim Bulliqi.

Sipas videos që ka siguruar Insajderi, duket se Shpejtim Bulliqi dhe Shaip Shabani kanë shoqëri të mirë me njëri-tjetrin.

Nuk dihet se për çka ishin mbledhur, por po festonin me muzikë live, mish e birra.

Vlen të theksohet se kjo nuk është hera e parë që Bulliqi i shpërblen me tenderë dostat e tij.