Pijet joalkoolike të njohura si “Sprite”, “Fanta”, “Bitter Lemon” apo “Schweppes” janë kërkesat e udhëheqësve komunal të Fushë Kosovës. Kjo komunë ka ndarë afër 10 mijë euro nga buxheti i saj me qëllim furnizimin me pije për udhëheqësit komunal.

Siç njofton Komisioni Rregullativ i Prokurimit Publik, më 23 shkurt të këtij viti Komuna e Fushë Kosovës ka bërë njoftim për dhënie të tenderit për “Furnizim me pije joalkoolike nga byfeja për udhëheqësit komunal”.

Nga buxheti i saj, kjo komunë e vogël e shtetit të Kosovës ka ndarë saktësisht 9,800 euro për furnizim me pije joalkoolike për nevoja të udhëheqësve të komunës, raporton Insajderi.

Komuna e cila udhëhiqet nga kryetari Burim Berisha, nga Lidhja Demokratike e Kosovës, është treguar specifike në kërkesat e saj për tenderuesit potencial. Por, në këto kërkesa nuk parashtrohet nevoja që ato pije të jenë prodhime vendore apo jo.

“Pije ne kanaqe 330ml (coca-cola,fanta,sprite,biter lemon,tonik,shëeeps,çaj i ftohte)-2350 cope, lengje frutash paketim qelqi 250 ml (pjeshke,molle,dredhez,dardhe,ananas,vishnje,portokall) – 2350 cope, kafe (kafe turke,makiato e vogel,e madhe,kapucino,nes kafe)- 8000 cope, çaj filter 250 ml te gjitha llojet -3000 cope,uje mineral 0.50l – 2000 cope,uje natyral 0.50l – 4000 cope”, shkruhet në njoftimin për dhënie të kontratës nga Komuna e Fushë Kosovës.

Komuna në fjalë ka dhënë afat kohor prej 12 ditësh për dërgimin e tenderëve, deri më 6 mars, shkruan Insajderi.

Gazeta Online Insajderi i ka dërguar pyetje personit kontraktues, përfaqësues i Komunës së Fushë Kosovës, Bedri Obërtinca, mirëpo ai nuk i është përgjigjur atyre. /Insajderi.com