Kryetari i Kuvendit të Kosovës, Glauk Konjufca, ka pritur sot në një takim deputetin e Bundestagut Gjerman, Peter Beyer.

Në njoftimin e lëshuar, Konjufca e falënderoi Beyer për vizitën dhe theksoi rolin dhe kontributin e pazëvendësueshëm të Gjermanisë në mbështetje të Kosovës.

Ai nënvizoi se mbështetja e Gjermanisë është thelbësore për Kosovën dhe shprehu nevojën për thellimin e partneritetit mes dy vendeve përmes bashkëpunimit dhe projekteve të përbashkëta.

Gjatë bisedës, u trajtuan çështje të rëndësishme si ekonomia, zhvillimi dhe siguria.

Konjufca e informoi Beyer për zhvillimet aktuale dhe e cilësoi qasjen e Serbisë si një kërcënim për stabilitetin dhe zhvillimin e rajonit.