Kryeparlamentari Glauk Konjufca i ka cilësuar “ledhatuese ndaj Serbisë” deklaratat e emisarit të Gjermanisë për Ballkanin Perëndimor, Manuel Sarrazin, i cili gjatë vizitës në Kosovë javën e shkuar kërkoi që të hiqen masat e sigurisë ndaj mallrave serbe.

Konjufca tha në një konferencë për media pas mbledhjes së Kryesisë së Kuvendit se Procesi i Berlinit nuk mund të reduktohet në CEFTA.

“Mua nuk më duket se Procesi i Berlinit mund të reduktohet në CEFTA. Mosmarrëveshjet që ne i kemi sa i përket CEFTA-s dhe përpjekjet që Qeveria e Kosovës i ka lidhur me një marrëveshje të dinjitetshme të prezantimit të Kosovës në të gjitha këto marrëvehsje rajonale, mendoj që është e drejtë e mbrojtjes së interesit të Republikës së Kosovës, por Procesi i Berlinit është shumë më i gjerë dhe unë nuk pres që Kosova të përjashtohet nga ky proces”, tha ai.

Konjufca tha se ka një rrugë që rajoni të jetë, siç tha, funksional.

“Ajo që nuk mund të arrihet dhe ato që i tha z. Sarrazin gjatë vizitës së tij në Kosovë, është faktikisht njëfar modusi i ledhatimit të Serbisë ma merr mendja mua. Nëse doni të keni rajon funksional, ne e dimë se cila është rruga: është barazimi i Kosovës me Serbinë si dy shtete të pavarura që marrin pjesë në këto marrëveshje rajonale. Nëse ne ftohemi dhe diskriminohemi të marrim pjesë në baza zë pabarabarta me Serbinë, Kosova nuk e pranon dhe Kosova ka me luftu deri në fund për interesat e saj”, u shpreh Konjufca.

Konjufca tha se më mirë do të ishte që Sarrazin “ta ketë mendjen te mungesa e ndonjë sanskioni sa i përket Serbisë”.

“Kështu që, mua më duket i drejt qëndrimi i Qeverisë së Kosovës dhe shumë më mirë do të ishte që z. Sarrazin, shumë më shumë ta ketë mendjen te mungesa e ndonjë sanskioni sa i përket Serbisë, prej sulmit që e përmendem të Banjskës e deri te kjo e fundit para dyditësh, bllokimi i kufijve. Tash, nëse e analizoni këtë, pyetja normale do të ishte që kush atëherë qenka për bashkëpunim, e kush po investon në grupe terroriste për t’iu dhënë leje të drejtpërdrejt prej Ministrisë së Punëve të Brendshme për t’i bllokuar kufijtë e Kosovës”, tha Konjufca.

“Për shembull, unë s’e pashë z. Sarrazin që i pengoi kjo që iu bllokuan kufijtë e Kosovës nga ata që jo që kanë precedent penal, por janë edhe kriminelë ndërkombëtarë”, tha ai.

Masat e vendosura që ndaluan importin e mallrave nga Serbia që prej 15 qershorit të vitit të kaluar, ai tha se “janë vendosur nga aspekti i sigurisë”.