Koreja e Veriut lëshoi dy raketa balistike në ujërat e brigjeve të saj lindore, të fundit në një vit rekord për lëshimet testuese nga regjimi i Kim Jong Un.

Nisjet, të raportuara nga autoritetet koreano-jugore dhe japoneze, shënuan ditën e 35-të të këtij viti që Koreja e Veriut ka kryer një provë rakete.

Lëshimet e fundit vijnë pas pretendimit të Koresë së Veriut, se kishte testuar me sukses një motor rakete me lëndë djegëse të ngurtë, një zhvillim që mund të çojë në mundësinë e regjimit të Kim-it të lëshojë më shpejt dhe më me besueshmëri një raketë balistike ndërkontinentale (ICBM) në të ardhmen.

Testi i fundit i raketave i njohur i Koresë së Veriut ishte më 18 nëntor, kur lëshoi një Hwasong-17 ICBM.

Ushtria e Koresë së Jugut i identifikoi raketat si MRBM – raketa balistike me rreze të mesme., duke i quajtur lëshimet një provokim serioz që dëmton paqen dhe stabilitetin në Gadishullin Korean si dhe komunitetin ndërkombëtar.

Si Koreja e Jugut ashtu edhe Shtetet e Bashkuara i kërkuan Koresë së Veriut që të ndalojë menjëherë testimin e raketave, raporton CNN.