Koreja Veriore ka akuzuar autoritetet e SHBA-së të dielën për plaçkitje të diplomatëve të saj në aeroportin John F. Kennedy të New Yorkut, duke konfiskuar me forcë një bagazh diplomatik.

Përfaqësuesi i Ministrisë së Jashtme të Koresë Veriore tha se një delegacion i Veriut, teksa kthehej nga një konferencë e OKB-së për të drejtat e personave me aftësi të kufizuara, “bukfalisht ishte plaçkitur” në aeroportin John F. Kennedy në “një akt ilegal dhe i neveritshëm provokues”.

“Diplomatët e një shteti sovran po u plaçkitet bagazhi diplomatik në mes të New Yorkut ku ndodhet shtabi i përgjithshëm i OKB-së që shërben si vendtakim për takime ndërkombëtare përfshirë Asamblenë e Përgjithshme të OKB-së”, ka thënë përfaqësuesi, raporton Reuters.

“Kjo qartazi tregon se SHBA-ja është një vend kriminal dhe pa ligj i gangsterëve”, ka thënë përfaqësuesi në komentet e transmetuara nga agjencia zyrtare e lajmeve e Koresë Veriore.

Koreja Veriore ka thënë se në këtë rast vihet në pyetje nëse shtabi i përgjithshëm i OKB-së duhet të jetë në New York.

“Komuniteti ndërkombëtar duhet ta rishikojë seriozisht nëse New Yorku, ku ka ndodhur një ngjarje e tillë e plaçkitjes, është i përshtatshëm të shërbejë si vendtakim për takimet ndërkombëtare”, është shprehur ai.

Departamenti i Shtetit Amerikan dhe Shtëpia e Bardhë nuk ka pasur një reagim të menjëhershëm ndaj deklaratës së Koresë Veriore. /Insajderi.com