Liderët shtetëror të Kosovës kanë reaguar pas sulmit terrorist afër parlamentit britanik.

Presidenti Hashim Thaçi ka thënë se Kosova solidarizohet me familjet e viktimave dhe me të gjithë popullin britanik pas sulmit të sotëm terrorist në Londër.

“Mbetemi përherë të bashkuar dhe të patundur në mbrojtjen e vlerave tona demokratike perëndimore”, ka shkruar ai në llogarinë e tij në Facebook.

Ndërsa Kryetari i Kuvendit, Kadri Veseli, ka thënë se është shokuar nga sulmi në Londër, duke shtuar se lutjet dhe mendimet e tij në këto orë janë për viktimat e kësaj ngjarje.

Katër persona, përfshirë këtu një polic dhe burri që besohet se ka qenë sulmuesi, kanë vdekur si pasojë e sulmit afër parlamentit britanik në Londër, njofton BBC.

BBC njofton se gjatë sulmit, të cilin policia britanike e ka cilësuar si incident terrorist, kanë mbetur të lënduar edhe 20 persona.

Një person ka goditur me veturë disa këmbësorë para se të vriste policin duke e therur me thikë.

Deri më tani nuk janë dhënë detaje rreth sulmuesit apo motivit të këtij akti që ka tronditur Britaninë./Insajderi.com