Plan-Propozimi i BE’së për normalizimin e marrëdhënieves ndërmjet Kosovës dhe Serbisë, në formën siç është aktualisht, nuk e ka mbështetjen e Partisë Demokratike të Kosovës, deklaroi kryetari i kësaj partie, Memli Krasniqi, shkruan Insajderi.

Krasniqi iu ra kritikave të njëjta se kjo marrëveshje e dakordësuar në Bruksel nuk përmban njohje të ndërsjellë, nuk është gjthpërfshirëse dhe as përfundimtare.

Megjithatë ai pret të shohë se si do të zbërthehet ajo në Aneksin e Zbatimit.

“Kjo është marrëveshje ndërkombëtare dhe duhet të sillet në Kuvend për ratifikim, përndryshe nuk do të ketë validitet legal, nuk do të jetë obligativ. Kjo është shumë e rëndësishme të thuhet dhe sqarohet. Marrëveshja si e tillë i përmbushë kriteret që kërkohen nga neni 18 i Kushtetutës dhe duhet të sillet në Kuvend për ratifikim…Në momentin që një gjë e tillë arrihet ne do t’i vazhdojmë diskutimet tona, duke përfshirë mbledhjet e Këshillit Drejtues, kryesisë së partisë, diskutimeve të hapura për të vendosur për qëndrimin final. Por, një gjë ua them kështu si është kjo marrëveshje nuk mund të ketë mbështetjen tonë”, ka thënë ai për Kosovapress.

“Pa pasur një dakordim sa i përket planit të zbatimit, aneksit që përfshihet në nenin 11 s’ka marrëveshje fare. Neve na mbetet të shohim a do të ketë marrëveshje, apo jo, përtej deklarimeve taktizuese që mund t’i bëjnë palët…Ne duhet të shohim tekstin final, duhet të dimë a ka marrëveshje, pasi ajo është deklarative, e marrëveshja ndodh kur nënshkruhet. Deri në atë moment ka një rrugë të gjatë dhe unë besoj se ka dallime të mëdha sa i përket planit të zbatimit”, shton Krasniqi.

“Neni shtatë është neni më problematik i krejt kësaj marrëveshjeje. Esencialisht rrezikon të krijojë një status të një autonomie politike për komunitetin serb në njërën anë, po ashtu edhe një status të ekstraterritorialitetit religjioz për Kishën Ortodokse Serbe në anën tjetër. Tashmë liderët e shtetit po e pranojnë që është koncesion, por ende s’po tregojnë çfarë koncesioni është vërtet dhe çfarë niveli e dëmton rregullin kushtetues të Kosovës”, deklaron ai.

“Fatkeqësisht sot marrëveshja që është në tavolinë as nuk është finale, as gjithëpërfshirëse dhe as nuk e ka në qendër njohjen e ndërsjellë. Ne s’mund të jemi injorues ndaj këtyre fakteve, pasi ka degraduar ky proces, para së gjithash për shkak të përgjegjësisë që e ka Albin Kurti dhe për shkak të fajit të tij për t’i zbatuar ato kërkesa dhe ato qëllime shtetërore që me vite me radhë i kemi pasur të gjithë. Arroganca e tij, shpërfillja, moskoordinimi në kohën kur është dashur me partnerët ndërkombëtarë dhe shumë gabime të tjera, duke filluar prej mungesës së përvojës politike, diplomatike, negociuese dhe deri tek qasja tek të cilën e ka pasur të gabuar ka sjellë këtë rezultat”, thekson Krasniqi.

“Ka humbje të ambicies edhe nga ana e partnerëve ndërkombëtarë, sepse realisht ata sot nuk mund të ofrojnë më shumë. Është e dhimbshme që jemi në situatën që jemi me një qasje merre ose leje, kur kjo që na ofrohet të marrim është shumë herë më pak dhe më pak e rëndësishme sesa ajo që është diskutuar dhe punuar vite më radhë”, përfundon Krasniqi./Insajderi/