Kandidati për kryeministër nga Lëvizja Vetëvendosje, Albin Kurti, ka kërkuar nga kompania Devolli që të kthejë 62.6 milionë euro, të cilat ai i cilësoi si të marra në arbitrazhet e kurdisura.

Gjatë një tubimi zgjedhor në Prizren, Kurti tha se kjo çështje duhet të zgjidhet menjëherë dhe kërkoi që Devolli t’iu kërkojë falje për arbitrazhin e zhvilluar, duke shtuar se mallrat e huaja nuk mund të bëhen pronë e kompanive të tilla.

“Unë kërkoj përsëri nga pronari i korporatës Devolli që t’ia kthejë menjëherë Telekomit të Kosovës 62.6 milionë euro dhe t’iu kërkojë falje për arbitrazhin e kurdisur. Malli i huaj s’bëhet i yti. E krerët e prokurorisë qartazi kanë vdekur për së gjalli. Na duhet me doemos, na nevojitet një kryeprokuror i ri, profesionist, patriot, i ndershëm…”, tha Kurti.

Ai bëri thirrje për një ndryshim në strukturën e prokurorisë, duke kërkuar një kryeprokuror të ri, profesionist dhe patriot, pasi, sipas tij, “krerët e prokurorisë kanë vdekur për së gjalli”.

Kurti deklaroi se është e nevojshme që të zgjidhet një udhëheqës i ri për këtë institucion, që do të luftojë për drejtësi dhe do të sigurojë një sistem të drejtë për qytetarët.

Theksojmë se kjo nuk është hera e parë që Kurti sulmon Devollët e Prokurorinë./Insajderi