Kryeministri i Republikës së Kosovës nuk ka paralajmëruar asnjë aktivitet për nder të festës së “28 Nëntorit” – Ditës së Pavarësisë së Shqipërisë.

Në ueb-faqen e Kryeministrisë nuk është përcaktuar ndonjë aktivitet i kryeministrit Mustafa për nder të kësaj dite.

Krejt çka ai ka bërë sot është urimi i tij i shkurtë në facebook.

“Urime 28 Nëntori, Dita e Flamurit! Të gjithë ne sot ndjehemi Një, të fortë por edhe përgjegjës për ndërtimin dhe zhvillimin e shteteve dhe vendeve tona, gjithandej ku jemi”, ka shkruan ai në llogarinë e tij në rrjetin social facebook.

Por, kryeministri ka gjetur kohë që të jetë në hapjen e fushatës parazgjedhore në Drenas, për ta përkrahur kandidatin e saj për kryetar komune, prej orës 12:00.

Në Komunën e Drenasit sot hapet zyrtarisht fushata parazgjedhore për kryetar të kësaj komune.

Vlen të përmendet se kryeministri Mustafa kishte bërë kërkesë që dita e sotme 28 nëntor, të jetë ditë pushimi në Kosovë, në mënyrë që të gjithë qytetarët ta kenë mundësinë për ta festuar.

Propozimi i tij ishte miratuar në mbledhjen e Qeverisë./Insajderi.com