Kryeministri Isa Mustafa, ka deklaruar se Qeveria që ai drejton ka arritur 90 për qind të objektivave që ka pasur gjatë vitit 2015. E ka përshkruar vendin si shtet që po ec me të madhe duke lënë rajonin prapa.

Në një postim të mëngjesit në Facebook, Mustafa ka thënë se Kosova ka rritjen më të madhe ekonomike në rajon.

Kjo rritje sipas tij është 3.6 për qind.

Kryeministri që kishte premtuar rreth 150 mijë vende pune, ka thënë se gjatë vitit të kaluar janë punësuar rreth 18 mijë veta.

“Buxheti stabil, janë përmbushë detyrimet buxhetore. Fillimi I operimit të bizneseve për 27.5% më I lirë”, ka thënë ai.

Mustafa ka deklaruar se ka pasur rritje pagash prej 6 për qind, derisa rritje të ndihmave sociale 25 për qind.

“Rritja e fondeve për shtyllat e pensioneve kontributdhënës mbi 30 për qind dhe implementimi i pensioneve për veteran të UÇK-së”, ka thënë Mustafa.

“Është nënshkruar MSA, jemi ranguar të përfitojmë qindra miliona dollar nga MCC (Korporata e Sfidave të Mileniumit të SHBA), jemi në prag të fillimit të ndërtimit të Kosovës së Re. Është aprovuar Programi I Reformave Ekonomike, Strategjia Kombëtare Zhvillimore, ka filluar të implementohet Ligji për faljen e borxheve publike deri në fund të vitit 2008, me ligj është themeluar Fondi për garantimin e kredive për NVM-të, është në procedurë Ligji për Investime Strategjike”, ka thënë më tej ai.

Mustafa ka përmendur si sukses edhe procedimin në Kuvend të 80 projektligje, të cilët nuk janë miratuar as dhjetë për qind të tyre për shkak të krizës.

“Kushtet dhe rrethanat në të cilat kemi punuar i dini vet”, ka thënë në fund ai, pa përmendur bllokimin e kuvendit./Insajderi.com