Kryeministri Albin Kurti ditë më parë është pyetur për kritikat që ia kanë dhënë partitë opozitare diplomacisë së udhëhequr nga Donika Gërvalla.

Ai tha se sulmet ndaj saj po i vijnë edhe nga ish-partia e saj, derisa përmendi edhe përjashtimin e Gërvallës nga një mbledhje e Këshillit të Përgjithshëm të LDK-së kur ajo ishte pjesë e partisë – madje kur e mbrojti atë e përdori argumentin se “ajo është vajza e dëshmorit të kombit”.

“Mos harroni se po ankohet në ministren e Jashtme subjekti politik, i cili kur ka qenë kjo anëtare nuk e ka lejuar të hyjë në mbledhje të Këshillit të Përgjithshëm. E mbani mend se si janë përdorur truprojat që zonja e nderuar, vajza e dëshmorit e heroit kombëtar, të mos lejohet të hyjë në mbledhjen e Këshillit të Përgjithshëm të LDK-së”, tha Kurti para pak ditësh në një intervistë në RTK, transmeton Gazeta Insajderi.

Madje pak foli edhe për vetën, duke thënë “ata dëshirojnë që ta bëj edhe unë të njëjtën, por jo vetëm që s’jam i njëjtë me ta, por jam shumë i ndryshëm prej tyre”.

Por duket se sot u bë i njëjtë sikur ata, kur e shpërfilli Bahrije Hotin, motrën e dëshmorit, dhe kushërirën e heroit Ukshin Hoti.

Derisa vizitonte varrezat e martirëve të lirisë në Krushë të Madhe, ai u përballë me Hotin e cila ka kërkuar nga shefi i ekzekutivit të dijë arsyet pse është shkarkuar si diplomate e Kosovës.

“Më vjen mirë që keni ardhur sot. Por, si është e mundur që unë para një jave jam pushuar nga puna si diplomate e Kosovës, duke dalë nga ky gjak, sakrifica e këtyre dëshmorëve më ka dërguar të shkollohem në Austri dhe unë sot me padrejtësinë më të madhe, para një jave shkarkohem nga puna si diplomate”, i thotë Kurti nën arsyetimin se “nuk e di këtë gjë, duhet ta kuptosh”.

Ajo sërish ka insistuar duke i treguar  Kurtit se ka pasur padrejtësi gjatë shkarkimit të diplomatëve.

“E kuptoj, por padrejtësitë po vazhdojnë me të thënë të drejtën. Unë jam betuar para varrit, para gjakut të këtyre dëshmorëve”, thoshte ajo, shkruan Gazeta Insajderi.

Kurti megjithatë është zotuar se do të interesohet për shkarkimin e saj nga vartësja e tij, shefja e diplomacisë, Donika Gërvalla.

Por, ja çka kishte thënë Gërvalla para një jave, kur e kishte shkarkuar Hotin.

“Ministria e Punëve të Jashtme dhe Diasporës, pas një analize të detajuar ligjore, sot ka ndërprerë marrëdhëniet e punës së 11 punonjësve të kësaj ministrie. Ky vendim është marrë në vazhdën e masave për vendosjen e ligjshmërisë në administratën publike të Kosovës dhe anulimit të vendimeve të jashtëligjshme, të marra në të kaluarën”, thuhej në njoftimin e ministrisë së Gërvallës, transmeton Gazeta Insajderi.

“Personat e liruar sot nga detyra janë punësuar pa iu nënshtruar procedurave të rregullta të pranimit në shërbimin e jashtëm, të përcaktuara me Ligjin për Shërbimin e Jashtëm të Republikës së Kosovës dhe as procedurave dhe rregullave të pranimit sipas Ligjit për Shërbimin Civil të Republikës së Kosovës, i zbatueshëm në kohën kur këta persona janë emëruar në shërbimin e jashtëm. Ata kanë hyrë dhe janë konsideruar anëtarë të shërbimit të jashtëm përmes vendimeve arbitrare”.

“Ministria e Punëve të Jashtme dhe Diasporës është duke shqyrtuar edhe masat që duhet të ndërmerren ndaj zyrtarëve përgjegjës për punësimin e paligjshëm të personave të mësipërm.Qeveria e Republikës së Kosovës mbetet e vendosur në zotimin e saj për vendosjen e ligjshmërisë në vend. Keqpërdorimi i parasë publike dhe punësimet e paligjshme nuk kanë vend në administratën publike dhe do të ndalen dhe luftohen me vendosmëri”, vazhdonte tutje njoftimi.

Bahrije Hoti ka punuar diplomate në disa nga ambasadat e Kosovës jashtë vendit.

IN Promo Marketing

VIPA sjell risi në treg: MAXI tashmë i disponueshëm me dy shije të reja

KESCO prezanton oferta të reja për bizneset në tregun e hapur

Numërimi i ditëve ka filluar – më 3 Tetor zbulohet fituesi i madh