Kryeministri Albin Kurti mori pjesë në inaugurimin e linjës hekurudhore Hani i Elezit-Fushë Kosovë, me ç’rast tha se sot shënohet një hap i rëndësishëm për hekurudhat e Kosovës.

“Sot po e shënojmë një çast vendimtar për hekurudhën në Republikën e Kosovës. Po e rindërtojmë linjën 10 që e lidhë Hanin e Elezit me Fushë Kosovën. Po hapim, në veçanti, dy tunele: njëri me gjatësi 262 metra dhe tjetri me gjatësi 122 m.,që kanë qenë të shembur tërësisht”, tha kryeministri Kurti.

Kryeministri tha se rreth 165 milionë euro është vlera e punimeve vetëm në segmentin e linjës 10, nga kufiri me Maqedoninë e Veriut deri në Fushë Kosovë, ndërsa mbi 200 milionë euro është vlera e punimeve që planifikohet në segmentin nga Fushë Kosova në Mitrovicë e nga Mitrovica në kufirin verior të Republikës së Kosovës.

Ai falënderoi BE-në, Bankës Evropiane për Investim dhe Bankës Evropiane për Rindërtim dhe Zhvillim për mbështetjen e financimit dhe rehabilitimit të kësaj linje hekurudhore, e cila sipas kryeministrit do t’i sjellë qytetarët e Kosovës edhe më pranë BE-së.

“Projekti i përgjithshëm parasheh 13 ura të reja dhe 7 tunele të rindërtuara sipas standardeve më të larta të transportit hekurudhor”

“Hekurudha është e rëndësishme se na lidhë me rajonin dhe hap shtegun e rritjes dhe zhvillimit që e synojmë, që fatkeqësisht për një kohë të gjatë u injorua, derisa u degradua”, tha kryeministri Kurti.