Kryeministri i Kosovës, Albin Kurti, ka reaguar pas vdekjes së Dion Ademajt dhe Mirsada Ademajt, nënë e bir, si pasojë e vërshimeve në Pejë.

Kurti, me anë të një postimi në ‘Facebook’ ka shprehur ngushëllime për familjarët dhe miqtë e të ndjerëve, shkruan Gazeta Insajderi.

“Me pikëllim të thellë mora lajmin për humbjen tragjike të jetëve të dy qytetarëve tanë, Dion Ademaj dhe Mirsada Ademaj, nga vërshimet e mbrëmshme në Pejë. Kjo humbje e madhe për familjet Ademaj dhe Hoxhiq është humbje e madhe për vendin tonë. Në këto ditë të rënda, dhembjen e ndajmë bashkë me familjarët dhe miqtë e tyre. Në emër të Qeverisë së Republikës së Kosovës dhe në emrin tim personal, ju shpreh ngushëllimet më të sinqerta”, ka shkruar Kurti, duke uruar shërim sa më të shpejt për të lënduarit.

Shefi i Qeverisë ka thënë se Qeveria e Kosovës në koordinim me institucionet relevante janë në komunikim me Komunën e Pejës për koordinim veprimesh.

“Qeveria e Republikës së Kosovës është e angazhuar me kapacitetet e saj me Forcën e Sigurisë së Kosovës dhe Agjencinë për Menaxhimin e Emergjencave që të ndihmojë në përballimin dhe tejkalimin e pasojave të vërshimeve. Ministri i Mbrojtjes, Armend Mehaj, Ministri i Punëve të Brendshme, Xhelal Sveçla dhe Ministri i Administrimit të Pushtetit Lokal, Elbert Krasniqi, janë në komunikim me Komunën e Pejës për të koordinuar veprimet në ofrim të mbështetjes së nevojshme”. /Insajderi.org/