Kryeministri i Kosovës, Albin Kurti, ka bërë një shkrim në stilin e analistit amatoresk lidhur me humbjet e Akil Gjakovës në kuadër të lojërave olimpike ‘Paris 2024’. Ai iu është përzirë paksa referit që po referonte ndeshjen në ‘Champ-de-Mars Arena’.

Kurti tha se të dy medaljet Akil Gjakova i humbi “për pak”, shkruan Gazeta Insajderi.

“Ndeshjen e parë e zhvilloi krah për krah, sepse njëkohësisht, me motrën e tij Norën. Përderisa Nora e përmbylli rrugëtimin e saj në Paris 2024, ai fitoi dhe me vazhdoi garat tutje duke mundur dy herë kundërshtarët të cilët ndodhen më lart se ai në ranglistën botërore”, shkroi Kurti.

“U eliminua në gjysëmfinale nga numri 1 në botë, pasi që të gjithëve që ishim prezent në Champ-de-Mars Arena na u duk se fitoi me Ippon, por jo edhe referit në tatami. E në betejën e tij për medalje të bronztë, Thembra e Akilit ishte ajo pjesë e sekondës kur një lëvizje fort e qëlluar nuk përmbyllet plotësisht”, deklaroi Kurti në ‘Facebook’ në stilin e analistit.

Akil Gjakova sot ka mbetur pa medalje olimpike.

Xhudisti kosovar është mposhtur edhe në repesazh, kështu duke mos arritur të fitojë as medaljen e bronztë.

Gjakova e gjeti humbjen nga xhudisti japonez, Soichi Hashimoto.

28-vjeçari kaloi në repesazh, pasi u mposhtë në gjysmëfinale nga numri një i botës në kategorinë e tij, xhudisti nga Azerbajxhani, Heydarov. /Insajderi.org/