Lëvizja Vetëvendosje, më konkretisht shefja e grupit parlamentar, Mimoza Kusari – Lila ka reaguar pasi AAK-ja paralajmëroi mocion mosbesimi ndaj Qeverisë Kurti.

Në një konferencë për media, Kusari-Lila u pyet mbi këtë çështje, ku tha se nuk është hera e parë që AAK-ja inicion mocion të mosbesimit.

“Nuk e konsiderojmë që ka hapësirë apo nevojë për dorëheqje ose përmbyllje të legjislaturës e Qeverisë. Kemi opozitën që ka kërkuar zgjedhje të reja…megjithatë, ekzistojnë dy forma, njëra është me mocionin e mosbesimit, duhet t’i kenë votat, nuk është hera e parë që AAK-ja që i ka vetëm tetë deputetë, dhe një grup parlamentar të opozitës që ka thënë se s’i jep nënsknshkrimet, inicion mocionin e mosbesimit, dhe e dyta është shpërbërja e Kuvendit.” – u shpreh ajo.

Ndryshe, Aleanca për Ardhmërinë e Kosovës ka prezantuar një Mocion përmbajtësor në emër të deputetëve të kësaj partie, të dërguar te kryesia e Kuvendit të Kosovës, më konkretisht, kryeparlamentari Glauk Konjufca.

Ky subjekt politik ka publikuar edhe një draft rezolutë, në të cilën thuhet:

“1.Të gjithë parametrat e deritashëm, sot në tre vjetorin e kësaj Qeverie, janë dëshmi se janë plotësuar të gjitha kushtet që qeveria ta përmbyllë mandatin e saj me dorëheqje, ose me mocion për shkarkimin e saj, të propozuar nga AAK.

2. Pas dorëheqjes ose shkarkimit të qeverisë, të shpërbëhet Kuvendi i Republikës së Kosovës”.