Senati e emëroi ish-sekretarin amerikan të Thesarit, Jack Lew, ambasador të SHBA-së në Izrael, pavarësisht kundërshtimit të ashpër nga republikanët mbi përfshirjen e tij në marrëveshjen bërthamore të Iranit gjatë administratës së Obamës.

Udhëheqësi i shumicës në Senat, Chuck Schumer, theksoi rëndësinë e plotësimit të vendit vakant në Izrael në mes të konfliktit aktual, raporton CNN, përcjell Gazeta Insajderi.

“Me atë që po ndodh në Izrael tani, emërimi i Jack Lew në këtë moment do të jetë një nga vendimet më të rëndësishme që Senati ka marrë që një kohë të gjatë”, tha ai.

“Lew ka një histori të gjatë dhe të dëshmuar si nëpunës publik dhe aleat i madh i Izraelit, i cili do të ndihmojë në dërgimin e një mesazhi të fuqishëm mbështetjeje për Izraelin”.

Senatorët Lindsey Graham dhe Rand Paul ishin dy republikanët e vetëm që votuan për emërimin e Lew. Pas votimit, Graham lëshoi një deklaratë duke mbrojtur votën e tij.

“Ka shqetësime legjitime për zotin Lew. Megjithatë, unë e di nga udhëtimi im i fundit në Izrael se është e domosdoshme që Shtetet e Bashkuara të kenë një ambasador atje”, tha Graham. /Insajderi.org/