Kuvendi i Kosovës do të mbajë sot dy seanca, në njërën prej të cilave do të mbahet debat parlamentar pwr rastin e arrestimit nga autoritetet serbe të drejtorit të Policisë së Kosovës për rajonin e Mitrovicës, Nehat Thaqi.

Thaqi është arrestuar më 29 shtator në vendkalimin kufitar në Konçul dhe me vendimin e një gjykate të lartë në Nish, i është shqiptuar masa e paraburgimit prej 30 ditësh.

Thaçi, të hënën, është dërguar nga burgu i Nishit në Beograd, ku është marrë në pyetje në Gjykatën Speciale.

Seanca e kërkuar për debat në Kuvendin e Kosovës është thënë se ka qëllim t’i kërkojë Qeverisë së Kosovës të ndërmarrë hapa konkretë për lirimin e Thaqit.

Në një njoftim për media, bëhet e ditur se seanca e parë do të fillojë në orën 10:00, ndërsa seanca e jashtëzakonshme për Nehat Thaqin do të fillojë në orën 14:00.

Seanca plenare do të ketë këtë rend dite:

1. Koha për deklarime jashtë rendit të ditës,
2. Koha për pyetje parlamentare,
3. Miratimi i procesverbalit nga seanca e mëparshme,
4. Votimi për emërimin e një anëtari në Komisionin për Kërkesa Pronësore,
5. Votimi i Projektligjit për Investimet Strategjike në Republikën e Kosovës,
6. Votimi i Propozim-Rezolutës lidhur me Kodin telefonik shtetëror të Republikës së Kosovës,
7. Votimi i Propozim-Rezolutës lidhur me situatën aktuale politike në pjesën veriore të Republikës së Kosovës,
8. Shqyrtimi i parë i Projektligjit nr. 05/L-117 për Akreditim,
9. Shqyrtimi i dytë i Projektligjit nr. 05/L-047 për ndryshimin dhe plotësimin e Ligjit nr. 04/L-065 për të drejtat e Autorit dhe të drejtat e përafërta,
10. Zgjedhja e një (1) anëtari të Këshillit Prokurorial të Kosovës,
11. Shqyrtimi i Raportit mbi gjendjen në Shërbimin Civil të Republikës së Kosovës për vitin 2015,
12. Shqyrtimi i Raportit të Agjencisë së Statistikave të Kosovës për vitin 2015.