Gjatë aksionit të mbrëmshëm të Hetimeve Rajonale në Prizren është arresuar një person nën dyshimin për blerje, posedim dhe shpërndarje të substancave narkotike.
Personi i arrestuar është Arianit Shala.
Lajmin e ka konifrmuar për Gazetën Insajderi, zëdhënësja e Prokurorisë Themelore në Prizren, Fitore Mehmeti.
“Nga Departamenti i Krimeve të Rënda me urdhër të prokurorit është ndaluar i dyshuari me inicialet A.Sh., nën dyshimin se ka kryer veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” nga neni 267 të Kodit Penal”, tha Mehmeti.
Me vendim të prokurorit të dyshuarit i është caktuar masa e ndalimit 48 orësh.
“I pandehuri i lartëcekur, me vendim të prokurorit të shtetit gjenden nën masën e ndalimit 48 orësh, dhe për të njëjtin Prokuroria Themelore në Prizren, do të vazhdoj me veprime të tjera hetimore”, thuhet në përgjigjen e Fitore Mehmeti.
Për rastin ka njoftuar edhe policia e Kosovës në raportin 24 orësh, ku thuhet së janë konfiskuar nga i dyshuari substancë narkotike kokainë rreth 10.8 gram.
“Gjatë kontrollit në shtëpinë e tij janë gjetur dhe konfiskuar një sasi me substancë narkotike e llojit kokainë me peshë 10.8 gram, një peshore digjitale, disa para të vogla, një telefon dhe një fishek. Me urdhër të prokurorit i dyshuari është dërguar në mbajtje”, njoftoj policia.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
